Amur laqabli yo‘lbarsga ozuqa sifatida berilgan, biroq u bilan do‘stlashib qolib, yirtqichni o‘z uyidan quvib chiqargan Timur laqabli echkini boshqa volyerga o‘tkazishmaydi, chunki uning hayoti xavf ostida emas, deya xabar bermoqda “RIA Novosti” Primorye safari bog‘i direktoriga tayanib.
“Mana beshinchi kundirki, Amur va Timur birga tunamoqda, avvallari yo‘lbars ertalab volyerdan chiqib, o‘z ishlari bilan mashg‘ul bo‘la boshlagan bo‘lsa, endi echki uning ortidan kelishini kutib o‘tiradi. O‘ylashimizcha, oxir-oqibat, Amur Timurni yeb qo‘ymaydi, chunki u echkini o‘lja emas, balki o‘zi bilan bir xil mavqega ega jonivor sifatida ko‘rmoqda”, — dedi bog‘ direktori.
Uning qo‘shimcha qilishicha, jonivorlar birga yashay boshlaganidan beri ular tirik ozuqa bilan siylangan. “Biroq Timurga uning munosabati boshqacha — uni xuddi tengquridek ko‘radi, ular, hatto, suvni ham birgalikda ichadi”, — dedi u.
Eslatib o‘tamiz, avvalroq Rossiyaning Primorye o‘lkasidagi safari bog‘ida Amur laqabli yo‘lbarsga tirik ozuqa sifatida botir echkini keltirib berishgani, u o‘ljani yemay qo‘ya qolgani xabar berilgan edi. Timur laqabli echki yirtqichni poda boshida boruvchi hayvon deb o‘yladi va uning ortidan qolmadi. Kunduzlari Timur va Amur katta volyerda birgalikda sayr qiladi. Buning ustiga, echki yo‘lbarsni uyidan quvib chiqardi va bir necha kundan beri uning joyida uxlamoqda. Amur uychaning tomiga chiqib olishga majbur bo‘ldi.
Izoh (0)