25-noyabr, chorshanba kuni Turkiya prezidenti Rajab Toyyib Erdo‘g‘on garchi Su-24 Suriyaga qulagan bo‘lsa-da, uning ayrim bo‘laklari Turkiya hududiga tushgani va ikki nafar turk fuqarosini jarohatlaganini ma’lum qildi. Bu haqda “Korrespondent.net” xabar bermoqda.
Turkiya OAVlar mazkur fuqarolar va ularning ayni paytdagi holati haqida batafsil hikoya qilmoqda. Jumladan, ularning bildirishicha, Rossiya samolyoti metall parchasi Turkiya va Suriya chegarasi yaqinidagi Xatay viloyatida yashovchi 60 yoshli Mavlud Xo‘rozning oyog‘i, qudasi Ahmad Toshtemirning esa qulog‘iga tekkan.
Dastlabki muolajalarni olganidan so‘ng Mavlud kasalxonadan chiqishga ulgurgan, unga oyog‘ida qolgan no‘xotdek metall bo‘lagini olib tashlash uchun jarrohlik amaliyoti kerak bo‘lishi bildirilgan. Turkiyaning ikkinchi fuqarosi — Ahmad Toshtemirning ham holati qoniqarli ekanligi aytilmoqda.
Izoh (0)