Dubay fuqarolik himoyasi xizmati o‘t o‘chiruvchilar uchun uchuvchi reaktiv qurilma sotib oldi. Bu osmono‘par binolarning yuqori qavatlariga tez va xavfsiz chiqish imkonini beradi, deya xabar beradi National Geographic.
Dubay fuqarolik himoyasi xizmati Yangi Zelandiyaning Martin Aircraft kompaniyasi tomonidan ishlab chiqilgan 20 ta jetpak va ikkita mashg‘ulot simulyatorini xarid qildi. Martin Jetpack 120 kilogrammgacha og‘irlikni ko‘tara oladi, tezligi soatiga 74 kilometrni tashkil etadi, 45 litr benzin yarim soat ishlashiga yetadi. Bu uchuvchi qurilma to‘rt silindrli dvigatel yordamida harakatga keladi.
Garchi aslida reaktiv bo‘lmasa-da, hozirga kelib bunday nomlanish insonga havoga ko‘tarilish imkonini beradigan ryukzak ko‘rinishidagi barcha qurilmalar uchun umumiy bo‘lib qoldi. Martin Jetpack yordamida vertolyot qo‘na olmaydigan tor, ensiz maydonlarga ham vertikal ravishda parvoz qilish va qo‘nish mumkin. Bunday qurilma ming metrgacha bo‘lgan balandlikka ko‘tarilishga imkon beradi.
Salkam 1000 ga yaqin osmono‘par binolari bor shahar uchun bunday qurilmaga ega bo‘lish muhim ahamiyat kasb etadi.
Izoh (0)