16-noyabr kuni O‘zbekiston Respublikasi Vazirlar Mahkamasi huzuridagi Toshkent islom universitetida Din ishlari bo‘yicha qo‘mita va YuNESKOning O‘zbekistondagi vakolatxonasi hamkorligida “Konfessiyalararo muloqot va diniy bag‘rikenglik – jamiyat barqarorligi garovi” mavzusida xalqaro ilmiy-amaliy anjuman bo‘lib o‘tdi. Bu haqda Din ishlari bo‘yicha qo‘mita rasmiy sayti xabar bermoqda.
Anjumanda O‘zbekistondagi diniy konfessiyalar rahbarlari, Germaniyaning Branderburg apostoli, Rossiya kabi davlatlardan diniy tashkilotlar rahbarlari, O‘zbekistondagi xorijiy davlat elchixonalarining va YuNESKOning vakillari, Rossiya Federatsiyasining Sverdlovsk viloyat muftiysi, olimlar, mutaxassislar va milliy-madaniy markazlar a’zolari ishtirok etdi.
Anjumanda dunyoning ayrim mintaqalarida diniy aqidaparastlik va millatchilik urush va nizolarga sabab bo‘layotgan tahlikali bugungi kunda ko‘pmillatli jamiyatda nafaqat dinlararo totuvlikka erishish mumkinligi, balki ko‘pkonfessiyaviylik asosida demokratik islohotlarni ildam amalga oshirish imkoniyati mavjudligi ta’kidlandi.
Anjumanda aytilishicha, bugun respublikada 16 ta diniy konfessiyaga mansub 2238 ta diniy tashkilot, 130 dan ortiq millat vakillarini o‘zida jamlagan 140 ga yaqin milliy-madaniy markaz, Imom Buxoriy nomidagi Toshkent islom instituti, 9 ta o‘rta maxsus islom bilim yurti, pravoslav va protestant seminariyalari faoliyat olib bormoqda. Ularda talabalar diniy ilmlar bilan bir qatorda dunyoviy ilmlarni olish imkoniyatiga ham ega.
“Xalqaro bag‘rikenglik kuni” munosabati bilan tashkil etilgan mazkur konferensiya ishtirokchilari bugungi globallashuv davrida tinchlik va barqarorlik naqadar ahamiyatliligini, buning uchun, albatta, dinlar, konfessiyalar, millat hamda elatlar o‘rtasida o‘zaro hamkorlik, bir-birini to‘g‘ri tushunishga erishish naqadar zarurligini misollar orqali ko‘rsatib berdi.
Izoh (0)