16 ноябрь куни Ўзбекистон Республикаси Вазирлар Маҳкамаси ҳузуридаги Тошкент ислом университетида Дин ишлари бўйича қўмита ва ЮНЕСКОнинг Ўзбекистондаги ваколатхонаси ҳамкорлигида «Конфессиялараро мулоқот ва диний бағрикенглик – жамият барқарорлиги гарови» мавзусида халқаро илмий-амалий анжуман бўлиб ўтди. Бу ҳақда Дин ишлари бўйича қўмита расмий сайти хабар бермоқда.
Анжуманда Ўзбекистондаги диний конфессиялар раҳбарлари, Германиянинг Брандербург апостоли, Россия каби давлатлардан диний ташкилотлар раҳбарлари, Ўзбекистондаги хорижий давлат элчихоналарининг ва ЮНЕСКОнинг вакиллари, Россия Федерациясининг Свердловск вилоят муфтийси, олимлар, мутахассислар ва миллий-маданий марказлар аъзолари иштирок этди.
Анжуманда дунёнинг айрим минтақаларида диний ақидапарастлик ва миллатчилик уруш ва низоларга сабаб бўлаётган таҳликали бугунги кунда кўпмиллатли жамиятда нафақат динлараро тотувликка эришиш мумкинлиги, балки кўпконфессиявийлик асосида демократик ислоҳотларни илдам амалга ошириш имконияти мавжудлиги таъкидланди.
Анжуманда айтилишича, бугун республикада 16 та диний конфессияга мансуб 2238 та диний ташкилот, 130 дан ортиқ миллат вакилларини ўзида жамлаган 140 га яқин миллий-маданий марказ, Имом Бухорий номидаги Тошкент ислом институти, 9 та ўрта махсус ислом билим юрти, православ ва протестант семинариялари фаолият олиб бормоқда. Уларда талабалар диний илмлар билан бир қаторда дунёвий илмларни олиш имкониятига ҳам эга.
«Халқаро бағрикенглик куни» муносабати билан ташкил этилган мазкур конференция иштирокчилари бугунги глобаллашув даврида тинчлик ва барқарорлик нақадар аҳамиятлилигини, бунинг учун, албатта, динлар, конфессиялар, миллат ҳамда элатлар ўртасида ўзаро ҳамкорлик, бир-бирини тўғри тушунишга эришиш нақадар зарурлигини мисоллар орқали кўрсатиб берди.
Изоҳ (0)