Ertaga, 17-noyabr kuni O‘zbekiston milliy terma jamoasi Dohada Yamanga qarshi JCh—2018 2-bosqich saralashidan o‘rin olgan o‘yinda maydonga tushadi. KXDRga qarshi o‘yinda (3:1) sariq kartochka olgan Sardor Rashidov Yaman bilan bahsda maydonga tushish yoki tushmasligi haqida ko‘p munozaralar bo‘ldi, deb xabar qiladi “Uff.uz”.
Sababi ayrim manbalar Rashidov Yamanga qarshi Toshkentda o‘tgan uchrashuvda (1:0) ham sariq kartochka olganligi va KXDRga qarshi o‘yindagi ogohlantirish O‘zbekiston terma jamoasi yarim himoyachisi uchun ikkinchisi ekanini ta’kidlab o‘tgandi.
Eng qizig‘i, FIFA rasmiy saytida Yamanga qarshi o‘yinda Sardor Rashidov sariq olgan deb ko‘rsatilgan, OFK rasmiy saytida esa Odil Ahmedov ogohlantirilgani belgilib qo‘yilgandi. Mana shu holat ham ko‘pchilikni ikkilanishiga sabab bo‘layotgandi.
Bugun, 16-noyabr kuni O‘zbekiston futbol federatsiyasining bu boradagi so‘roviga ko‘ra, FIFA tashkiloti tomonidan Yamanga qarshi o‘yinda Sardor Rashidov emas, Odil Ahmedov ogohlantirilgani haqida hujjat kelgan. Bu haqda O‘FF matbuot xizmati rahbari Sanjar Rizayev o‘z Twitter sahifasida ma’lum qildi.
Demak, ertangi o‘yinda O‘zbekiston terma jamoasi safida Sardor Rashidov maydonga tushish imkoniga ega. Umuman olganda, ayni paytda terma jamoa tarkibida sariq kartochkalari ikkitaga yetgan futbolchi yo‘q.
Hozirda Sardor Rashidovdan tashqari, Aziz Haydarov, Javohir Sohibov, Yegor Krimets, Islom To‘xtaxo‘jayev va Odil Ahmedovda bittadan sariq kartochka bor.
Izoh (0)