Эртага, 17 ноябрь куни Ўзбекистон миллий терма жамоаси Доҳада Яманга қарши ЖЧ—2018 2-босқич саралашидан ўрин олган ўйинда майдонга тушади. КХДРга қарши ўйинда (3:1) сариқ карточка олган Сардор Рашидов Яман билан баҳсда майдонга тушиш ёки тушмаслиги ҳақида кўп мунозаралар бўлди, деб хабар қилади «Uff.uz».
Сабаби айрим манбалар Рашидов Яманга қарши Тошкентда ўтган учрашувда (1:0) ҳам сариқ карточка олганлиги ва КХДРга қарши ўйиндаги огоҳлантириш Ўзбекистон терма жамоаси ярим ҳимоячиси учун иккинчиси эканини таъкидлаб ўтганди.
Энг қизиғи, ФИФА расмий сайтида Яманга қарши ўйинда Сардор Рашидов сариқ олган деб кўрсатилган, ОФК расмий сайтида эса Одил Аҳмедов огоҳлантирилгани белгилиб қўйилганди. Мана шу ҳолат ҳам кўпчиликни иккиланишига сабаб бўлаётганди.
Бугун, 16 ноябрь куни Ўзбекистон футбол федерациясининг бу борадаги сўровига кўра, ФИФА ташкилоти томонидан Яманга қарши ўйинда Сардор Рашидов эмас, Одил Аҳмедов огоҳлантирилгани ҳақида ҳужжат келган. Бу ҳақда ЎФФ матбуот хизмати раҳбари Санжар Ризаев ўз Twitter саҳифасида маълум қилди.
Демак, эртанги ўйинда Ўзбекистон терма жамоаси сафида Сардор Рашидов майдонга тушиш имконига эга. Умуман олганда, айни пайтда терма жамоа таркибида сариқ карточкалари иккитага етган футболчи йўқ.
Ҳозирда Сардор Рашидовдан ташқари, Азиз Ҳайдаров, Жавоҳир Соҳибов, Егор Кримец, Ислом Тўхтахўжаев ва Одил Аҳмедовда биттадан сариқ карточка бор.
Изоҳ (0)