“O‘zbekiston temir yo‘llari” AJ qishloq xo‘jalik mahsulotlari tashish bilan shug‘ullanadigan yangi korxona tashkil etdi

“O‘zbekiston temir yo‘llari” AJ “O‘zbekjeldorekspeditsiya” unitar korxonasi tarkibida yangi sho‘ba korxonasi —“Poliz trans” UKni tashkil etdi. MDH va uchinchi davlatlarga temir yo‘l transporti yordamida meva-sabzavot, konservalangan va boshqa qishloq xo‘jalik mahsulotlari yetkazib berish yangi korxonaning asosiy vazifasi sanaladi. Bu haqda “O‘zbekjeldorekspeditsiya” UK ijrochi menejeri Kamola Yunusova ma’lum qildi, deya xabar beradi “Review.uz”.

Bu “O‘zbekjeldorekspeditsiya”ning ikkinchi sho‘ba korxonasi hisoblanadi. Birinchi sho‘ba korxona —“Sogdiana Trans” kompaniyasining faoliyati asosan Afg‘oniston hududidan o‘tuvchi temir yo‘l bilan bog‘liq. Kompaniya Hayraton— Mozori sharif yo‘nalishida uch yil mobaynida 7,8 million tonna yuk tashidi. Afg‘oniston jamoat ishlari vazirligi va “Sogdiana Trans” o‘rtasidagi hamkorlik shartnomasi yana uch yillik muddatga uzaytirildi.