Agar uzoq safarda, tog‘da yoki elektr quvvatiga ulanib bo‘lmaydigan joyda bo‘lsangiz, smartfon batareyasi iloji boricha uzoqroq ishlashi uchun quyidagilarni bajarish mumkin.
Energiya tejash rejimini yoqish
Ko‘pchilik telefonlarda “energiyani tejash” yoki “ultra tejamkorlik” rejimi mavjud. Uni yoqsangiz, telefon avtomatik ravishda ekran yorqinligini pasaytiradi, fondagi ilovalarni to‘xtatadi, sinxronizatsiyani va boshqa keraksiz xizmatlarni o‘chiradi.
Keraksiz funksiyalarni o‘chirib qo‘yish
Hozirda foydalanmayotgan funksiyalar — Wi-Fi, mobil internet, Bluetooth, NFC va ayniqsa GPS’ni o‘chirish lozim. GPS eng ko‘p “yeydigan” ilovalardan biridir. Hattoki xarita ochilmasa ham, ob-havo, kamera yoki ijtimoiy tarmoqlar fon rejimida geolokatsiyani ishlatib turadi.
Qiziqarli fakt: GPS yoqilgan vaqtda telefon quvvati 25-30% tezroq tugaydi.
Ekran sozlamalarini o‘zgartirish
Ekran — telefonning eng ko‘p quvvat sarflovchi qismidir. Shuning uchun:
Yorqinlikni iloji boricha kamaytiring
Avtomatik yorqinlikni o‘chiring
Ekranning o‘chish vaqtini 15-30 soniyaga belgilang
Og‘ir ilovalarni yopish
O‘yinlar, YouTube, kamera yoki navigator singari ilovalar batareyani tez tugatadi. Ulardan foydalanmayotgan bo‘lsangiz, butunlay yoping. Faqat kerakli ilovalarni ochiq qoldiring, masalan, qo‘ng‘iroq, SMS yoki eslatmalarni.
Aviarajimni yoqish
Agar siz turgan joyda internet yoki aloqa kerak bo‘lmasa, “samolyot rejimi”ni yoqing. Bu telefoningizni minimal quvvatda ishlashiga yordam beradi. Bu rejimni faqat foto ko‘rish yoki kitob o‘qish uchun ishlatayotgan bo‘lsangiz, zaryadka yanada ko‘p tejaladi.
Qiziqarli fakt: Agar siz telefoningizda qora rejim (dark mode) rejimini yoqsangiz va ekran AMOLED texnologiyasida bo‘lsa, bu ham quvvatni sezilarli darajada tejaydi. Chunki AMOLED ekranlarda qora rang yoritilmaydi — bu esa 10–40% gacha quvvatni tejashga yordam beradi.
Xulosa qilganda, ekran va GPS funksiyasiga e’tibor bering, fondagi ilovalar va tarmoqlarni nazorat qiling, shunda smartfon akkumulyatori uzoqroq vaqt xizmat qiladi.
Izoh (0)