O‘zbekiston terma jamoasi va Moskvaning “SSKA” klubi hujumchisi Abbosbek Fayzullayev faoliyatini Turkiya Superligasida davom ettirishga yaqin turibdi. Futbolchi allaqachon Istanbulga uchib borgan va 23-iyul, chorshanba kuni “Bashakshehir” klubi uchun tibbiy ko‘rikdan o‘tishi kutilmoqda.
Championat nashri xabariga ko‘ra, futbolchi 7,5 million yevro evaziga turk klubiga o‘tmoqda. Agar transfer rasman tasdiqlansa, Fayzullayevning sobiq jamoasi — “Paxtakor” ham bu kelishuvdan foyda ko‘radi. Chunki Toshkent klubi va “SSKA” o‘rtasidagi shartnomada keyingi transferdan 10 foizlik ulush belgilangandi. Bu degani, “Paxtakor”ga taxminan 750 ming yevro to‘lanadi.
Fayzullayev “Bashakshehir”ga o‘tsa, ushbu klubdagi ikkinchi o‘zbekistonlik futbolchiga aylanadi. Istanbulliklar bunga qadar “Roma”dan Eldor Shomurodovni ham ijaraga olgan edi.
Ma’lumot uchun, Abbosbek Fayzullayev 2023-yildan beri “SSKA” sharafini himoya qilib keladi. U hozirga qadar moskvaliklar tarkibida 72 ta bahsda maydonga tushib, 8 gol va 22 assist muallifiga aylangan. U klub bilan Rossiya Kubogi hamda Superkubogini qo‘lga kiritdi. Transfermarkt portali futbolchining qiymatini 8 million yevroga baholamoqda.
Izoh (0)