Qozog‘istonning Halyk Bankʼi O‘zbekistondagi Click kompaniyasi aksiyalarini sotib olish bo‘yicha shartnoma imzoladi. Bu haqda kompaniya matbuot xizmati “Daryo”ga ma’lum qildi.
Shartnomaga ko‘ra, Halyk Click aksiyalarining 49 foizini 176,4 million dollarga sotib oladi, shuningdek, o‘zining to‘liq nazoratidagi O‘zbekiston sho‘ba korxonasi Tenge Bank aksiyalarining 49 foizini Click aksiyadorlariga 60,76 million dollarga sotadi.
Ushbu shartnomaning imzolanishi ikki tomon o‘zlarining mavjud huquqiy tuzilmalarini saqlab qolgan holda o‘zaro hamkorlikda ishlash imkoniyatini yaratadi.
“Bu Click kompaniyasi uchun tarixiy lahza. Halyk Bank bilan hamkorlik va Tenge Bank bilan imkoniyatlarni kengaytirish — millionlab foydalanuvchilarga jahon darajasidagi raqamli moliyaviy xizmatlarni taqdim etish yo‘lida muhim qadamdir. Shu bilan birga, Click aksiyalarining nazorat paketi amaldagi aksiyadorlarda qoladi va, albatta, kompaniya milliy brend yo‘lini davom ettiradi”, dedi kompaniya bosh direktori Ulug‘bek Rustamov.
Click millionlab foydalanuvchilarga o‘zining doimiy formatida xizmat ko‘rsatishda davom etadi. Kompaniyalar o‘rtasidagi hamkorlik doirasida Click’ning 20 milliondan ortiq foydalanuvchilari Tenge Bank tomonidan taqdim etiladigan zamonaviy va foydali takliflardan foydalanish imkoniyatiga ega bo‘ladi.
B2B sohasida ham yirik loyihalar amalga oshiriladi: Click bilan hamkorlik qilayotgan 70 mingdan ortiq servis korporativ bank mahsulotlariga ham kirish imkoniga ega bo‘ladi. Bu esa tadbirkorlar uchun yagona raqamli muhitda to‘lov va bank xizmatlari integratsiyalashgan noyob tizim yaratadi.
Click — onlayn to‘lovlar bozorida birinchi o‘rinni egallovchi O‘zbekistonning yetakchi fintex kompaniyasidir. U 20 milliondan ortiq foydalanuvchiga xizmat ko‘rsatadi.
Tenge Bank — korporativ va xususiy mijozlarga zamonaviy bank texnologiyalarini qo‘llagan holda moliyaviy xizmatlarni taqdim etuvchi universal bank. Ayni paytda Tenge Bank 100 foiz “Qozog‘iston Xalq Banki” (Halyk Bank) AJga tegishli sho‘ba korxona.
Halyk Bank — chakana, kichik va o‘rta biznes, korporativ bank xizmatlari, sug‘urta, lizing, brokerlik xizmatlari, aktivlarni boshqarish va layfstayl-xizmatlar sohalarida faoliyat yurituvchi Qozog‘istonning yetakchi moliyaviy guruhi. Bank mamlakatdagi eng yirik mijozlar bazasiga ega va eng keng filiallar tarmog‘iga ega — butun mamlakat bo‘ylab 542 ta filial va bo‘limlar mavjud. Shuningdek, bank Gruziya va O‘zbekistonda ham faoliyat yuritadi.
Izoh (0)