Farg‘onada bemorning sog‘lom oyog‘ini kesib tashlab, uning o‘limiga sababchi bo‘lgan shifokor 4 yil ozodlikdan mahrum qilindi. “Daryo” sud hujjati bilan tanishdi.
Voqea 2024-yilning noyabrida yuz bergan. Jinoyat ishlari bo‘yicha Quva tuman sudining 2025-yil 6-maydagi hukmiga ko‘ra, shifokor A.M. Jinoyat kodeksining 116-moddasining 3-qismi (kasb yuzasidan o‘z vazifalarini lozim darajada bajarmaslik odam o‘limiga sabab bo‘lishi) bilan aybdor deb topilgan. U 3 yil Sog‘liqni saqlash vazirligi tizimida rahbarlik va shifokorlik vazifasida ishlash huquqidan mahrum qilinib, 4 yil ozodlikdan mahrum qilish jazosi tayinlangan.
Shifokor apellyatsiya shikoyati berib, harakatlarida jinoyat tarkibi yo‘qligi, bemorning o‘limi uning harakatlari bilan bog‘liq bo‘lmagani haqida vajlar keltirgan hamda sud hukmini bekor qilib, oqlov hukmi chiqarishni so‘ragan. Jabrlanuvchining qonuniy vakili esa shifokordan 28 mln 995 ming so‘m moddiy va 350 mln so‘m ma’naviy zarar undirishni so‘ragan. 16-iyulda apellyatsiya instansiyasining ajrimi bilan dastlabki sud hukmi o‘zgarishsiz, apellyatsiya shikoyatlari qanoatlantirilmasdan qoldirilgan.
Voqea tafsiloti
Sudlangan shifokor A.M. Respublika ixtisoslashtirilgan endokrinologiya ilmiy-amaliy tibbiy markazi Farg‘ona filialining xirurgiya bo‘limi boshlig‘i lavozimida ishlagan. U 2024-yil 9-sentyabrdan 2024-yil 25-oktyabrgacha o‘z hisobidan ta’tilda bo‘lgan. Bu vaqtda bo‘lim mudiri vazifasini vaqtincha bajarish D.R. zimmasiga yuklatilgan.
Bemor ayol 18-oktyabrda farzandlari tomonidan olib kelingan. Unga “qandli diabet ikkinchi turi og‘ir shakli, dekompensatsiya bosqichi, DTS neyroishemik shakli, Vanger-4, chap oyoq boldir sohasida amputatsiyadan keyingi holat tizza bo‘g‘imi maydalanib sinishi” tashxisi qo‘yilgan.
A.M. shu kuni bo‘limning vaqtincha mudirini go‘yoki tajribasiz sifatida ko‘rsatgan holda bemorni davolash hamda jarrohlik amaliyoti o‘tkazish ishlaridan o‘zboshimchalik bilan chetlatgan. So‘ngra bemorning hayoti va sog‘lig‘ini xavf ostiga qo‘yib, biror-bir tibbiy ko‘rsatma bo‘lmagani holda uning “chap oyoq son sohasini amputatsiya qilish” rejasini ishlab chiqqan. Bu rejani tibbiy hujjatlar tarixiga bo‘limning vaqtinchalik mudiri nomidan rasmiylashtirgan.
Ammo 19-oktyabrda bo‘lib o‘tgan jarrohlik amaliyoti paytida bemorning biron-bir kasallik asorati bo‘lmagan o‘ng oyog‘i son sohasidan kesib tashlangan. Shifokorlar keyinchalik ayolning chap son sohasini ham ko‘r-ko‘rona amputatsiya qilgan. Jarrohlik amaliyoti A.M. o‘zboshimchalik bilan tanlangan tibbiyot xodimlari va tibbiy sohada mutaxassislikka ega bo‘lmagan talaba ishtirokida o‘tkazilgan.
Bemor ayol bir vaqtning o‘zida ikki og‘ir turdagi jarrohlik amaliyotini ko‘tara olmasdan, olgan tan jarohatlari asoratlari oqibatida 2024-yil 7-noyabrda vafot etgan.
Jinoyat kodeksiga ko‘ra, kasb yuzasidan o‘z vazifalarini lozim darajada bajarmaslik odam o‘limiga olib kelgan bo‘lsa, aybdor shaxs 2 yildan 5 yilgacha ozodlikni cheklash yoki 5 yilgacha ozodlikdan mahrum qilish bilan jazolanadi.
Izoh (0)