Германиялик пойгачи, «Формула-1» таснифидаги автомобиль пойгаларида етти карра жаҳон чемпиони ҳисобланган Михаэль Шумахер ўз ҳаёти ва саломатлиги учун курашда давом этмоқда. Бу ҳақда «ТАСС» хабар бермоқда.
Шумахер 2013 йил декабрида Франциянинг Мерибел курортида чанғи учиш вақтида йиқилиб, бошидан жиддий жароҳат олганди. У 2014 йил сентябридан бери Швейцариядаги Женева кўли соҳилида жойлашган ўз вилласида даволаниш курсини ўтамоқда, унинг саломатлиги ҳақидаги ижобий хабарлар камдан-кам пайдо бўлмоқда.
«Михаэль — менинг яқин дўстим, унинг оиласи мен учун қадрли. Мен тез-тез Михаэлни кўриб тураман. У курашишда давом этмоқда, биз ҳам унинг оиласи билан биргаликда Михаэль учун курашишда давом этишимиз керак», — деди Мексика Гран-приси давомида Халқаро автоспорт федерацияси (FIA) президенти Жан Тодт. Мексика Гран-приси пойгалари Тошкент вақти билан 2 ноябрга ўтар кечаси, 24:00 да бошланади.
Ўтган ҳафтада британиялик Льюис Хемилтон учинчи марта жаҳон чемпиони унвонини қўлга киритди. Mercedes пойгачисининг муваффақиятларига изоҳ бераракан, Тодт британиялик пойгачи Шумахернинг кўрсаткичларини такрорлашига ҳали вақт борлигини айтиб ўтди. «Михаэль эришган натижалардан фахрланаман. У қилган ишларни баъзан ёдимиздан чиқаришни бошлаймиз», — деди FIA раҳбари.
Изоҳ (0)