29-oktabr, payshanba kuni Toshkentda O‘zbekiston shoshilinch tibbiy yordam vrachlari assotsiatsiyasining III-syezdi o‘z ishini boshladi. Bu haqda O‘zbekiston Respublikasi Sog‘liqni saqlash vazirligi matbuot xizmati xabar bermoqda.
Syezd ishida Respublika shoshilinch tibbiy yordam ilmiy markazi va uning viloyat filiallari mutaxassislari, olimlar, xorijiy davlat vakillari qatnashmoqda. Anjumandan ko‘zlangan asosiy maqsad soha olimlari va mutaxassislari intilishlarini shoshilinch tibbiyotning ustuvor muammolarini yechish yo‘nalishida birlashtirib, doimiy va samarali ilmiy-amaliy hamkorlikni yuzaga keltirishdan iborat.
Tadbirda o‘zbekistonlik professor-olimlar, xorijlik mutaxassislar shoshilinch tibbiy yordam xizmatining aholi salomatligidagi o‘rni, ilmiy faoliyatdagi natijalar, erishilayotgan yutuqlar, amaliyotga tatbiq etilayotgan yangi davolash usullari kabi dolzarb mavzularga bag‘ishlangan ma’ruzalar bilan ishtirok etmoqda.
Ma’lumotlarga ko‘ra, Respublika shoshilinch tibbiy yordam ilmiy markazi va uning hududlardagi filiallarida har yili ikki milliondan ortiq bemorga tibbiy yordam ko‘rsatilmoqda va 200 mingdan ortiq murakkab jarrohlik amaliyotlari o‘tkazilmoqda.
Syezd ishi 30-oktabr kuni Respublika shoshilinch tibbiy yordam ilmiy markazida, seksiyalarda davom etadi.
Izoh (0)