Joriy yilning o‘tgan 9 oyi mobaynida “Toshkent-Aero” ixtisoslashtirilgan bojxona kompleksi xodimlari tomonidan huquqni muhofaza qiluvchi boshqa idoralar vakillari bilan hamkorlikda aniqlangan 90 ta qonunbuzilish holatlarida salkam 250 dona psixotrop tabletkalar hamda qiymati 730 million so‘mdan ortiq bo‘lgan tibbiyot buyumlari va dori-darmon vositalarining noqonuniy olib o‘tilishiga chek qo‘yilgan. Bu haqda Bojxona qo‘mitasi matbuot xizmati xabar bermoqda.
Jumladan, Toshkent xalqaro aeroportida “Dehli—Toshkent” reysi bo‘yicha parvozini yakunlagan fuqaro O.Rahimovga (maqoladagi barcha ism-shariflar o‘zgartirilgan) tegishli yuklar o‘rnatilgan tartibda bojxona ko‘rigidan o‘tkazilganda, undagi kiyimlar orasiga 488 dona turli dori vositalari yashirilganligi fosh qilindi. Aniqlanishicha, noqonuniy ravishda olib kirishga urinilgan mazkur dori vositalarining umumiy qiymati taxminan 14 million so‘mni tashkil qilar ekan.
Istanbuldan uchib kelgan S.Sanjarov bojxonachilarning ko‘zini shamg‘alat qilishga urinib, yirik midordagi dori-darmon vositalarini yashirin ravishda olib kirishni ko‘zlagan edi. Ammo, bojxona ko‘rigi chog‘ida ushbu shaxsning qiymati 73 million so‘mlik 2 turdagi 316 quti dori vositalarini qing‘ir yo‘llar bilan olib kirish rejasi barbod bo‘ldi.
Dori-darmon vositalarining olib kirilishida tarkibida psixotrop moddalar bo‘lgan dori vositalariga alohida yondashish talab etiladi. Chunki, jismoniy shaxslar olib kirayotgan preparat tarkibida kam miqdorda bo‘lsa-da giyohvand yoki psixotrop moddalar mavjud bo‘lsa va bu haqda yo‘lovchi bojxona deklaratsiyasida ko‘rsatmasa, ma’muriy yoki jinoiy javobgarlikka tortilishi mumkin.
Istanbulga parvozi oldidan fuqaro D.Boqiyevaning bezovtalanishi bojxonachilarda shubha uyg‘otdi. Shundan so‘ng unga tegishli qo‘l yuklari o‘rnatilgan tartibda bojxona ko‘rigidan o‘tkazilganda yuklar orasida yo‘lovchi bojxona deklaratsiyasida qayd qilinmagan va bojxona xodimining og‘zaki so‘rovi paytida ma’lum qilinmagan 48 dona “Fenazepam” psixotrop tabletkalari yashirilgani ma’lum bo‘ldi.
Xuddi shu turdagi tabletkalardan 50 donasini yashirin holda olib chiqishga uringan fuqaro A.Xegay ham “Toshkent—Novosibirk” yo‘nalishi bo‘yicha parvoz oldidan bojxonachilar qarshisida yer chizib qoldi.
Moskvadan uchib kelgan K.Tanya ham tavakkalga qo‘l urdi. Yo‘lovchi bojxona deklaratsiyasida va bojxona xodimlarining og‘zaki so‘rovi paytida ma’lum qilmasdan turib, bu ayol 143 dona “Fenazepam” psixotrop tabletkalarini noqonuniy ravishda olib kirishga uringan paytida to‘xtatib qolindi.
Giyohvandlik vositalari, psixotrop moddalar va prekursorlarni olib kirish va olib chiqish faoliyatning tegishli turi uchun litsenziyaga ega bo‘lgan yuridik shaxslar tomonidan O‘zbekiston Respublikasi Sog‘liqni saqlash vazirligi tomonidan beriladigan sertifikatlar asosida amalga oshiriladi.
Izoh (0)