2015-yil 5—6-noyabr kunlari butun O‘zbekiston bo‘yicha maktab, litsey, kollej va oliygohlarning 200 nafarga yaqin nemis tili o‘qituvchilari va dotsentlari malaka oshirish va o‘zaro tajriba almashish maqsadida Toshkent shahrida uchrashadi. Nemis tili o‘qituvchilarining 10-anjumani Germaniya Federativ Respublikasining O‘zbekistondagi elchixonasi, germaniyalik lektorlar, Gyote instituti, Robert Bosh jamg‘armasi va Germaniyaning xorijdagi maktablar bo‘yicha markaziy boshqarmasi (ZfA) tomonidan o‘zaro hamkorlikda tashkillashtirilmoqda. Bu haqda elchixonaning Madaniya va matbuot bo‘limi “Daryo”ga xabar berdi.
Anjumanning 5-noyabr kuni bo‘lib o‘tadigan ochilish marosimida Germaniya va Shveysariyaning O‘zbekistondagi elchilari hamda O‘zbekiston Oliy va o‘rta maxsus ta’lim va Xalq ta’limi vazirliklarining vakillari ishtirok etadi.
Ikki kunlik anjuman davomida turli mavzular bo‘yicha amaliy seminarlarning keng dasturi taqdim etiladi. Nemis tili darslarida zamonaviy nemis musiqasi va filmlaridan foydalanish yoki grammatika va adabiyotdan dars o‘tish kabi mavzular shular jumlasiga kiradi. Seminarlar germaniyalik va o‘zbekistonlik mutaxassislar tomonidan olib boriladi.
Mazkur anjuman nemis tili o‘qituvchilari va dotsentlari uchun o‘zaro tajriba almashish va O‘zbekiston nemis tili o‘qituvchilari uyushmasi bilan nemis tili fanining rivojlanish masalalari borasida o‘zaro fikr almashish imkoniyatini beradi.
Bu yilgi anjuman Toshkent shahridagi nemis tili chuqurlashtirilgan tarzda o‘qitiladigan va Germaniya Federativ Respublikasining “Maktablar: kelajak hamkorlari” tashabbusi doirasida qo‘llab-quvvatlanadigan 60-sonli o‘rta maktab binosida bo‘lib o‘tadi.
Nemis tili chet tili sifatida O‘zbekistonda biroz kichik, ammo muhim va yuqori sifatli o‘ringa ega. O‘zbekiston Respublikasi Xalq ta’limi vazirligining ma’lumotlariga ko‘ra hozirda mamlakat o‘quvchilarining 4 foizi nemis tilini o‘rganmoqda.
Izoh (0)