2015 йил 5—6 ноябрь кунлари бутун Ўзбекистон бўйича мактаб, лицей, коллеж ва олийгоҳларнинг 200 нафарга яқин немис тили ўқитувчилари ва доцентлари малака ошириш ва ўзаро тажриба алмашиш мақсадида Тошкент шаҳрида учрашади. Немис тили ўқитувчиларининг 10-анжумани Германия Федератив Республикасининг Ўзбекистондаги элчихонаси, германиялик лекторлар, Гёте институти, Роберт Бош жамғармаси ва Германиянинг хориждаги мактаблар бўйича марказий бошқармаси (ZfA) томонидан ўзаро ҳамкорликда ташкиллаштирилмоқда. Бу ҳақда элчихонанинг Мадания ва матбуот бўлими «Дарё»га хабар берди.
Анжуманнинг 5 ноябрь куни бўлиб ўтадиган очилиш маросимида Германия ва Швейцариянинг Ўзбекистондаги элчилари ҳамда Ўзбекистон Олий ва ўрта махсус таълим ва Халқ таълими вазирликларининг вакиллари иштирок этади.
Икки кунлик анжуман давомида турли мавзулар бўйича амалий семинарларнинг кенг дастури тақдим этилади. Немис тили дарсларида замонавий немис мусиқаси ва фильмларидан фойдаланиш ёки грамматика ва адабиётдан дарс ўтиш каби мавзулар шулар жумласига киради. Семинарлар германиялик ва ўзбекистонлик мутахассислар томонидан олиб борилади.
Мазкур анжуман немис тили ўқитувчилари ва доцентлари учун ўзаро тажриба алмашиш ва Ўзбекистон немис тили ўқитувчилари уюшмаси билан немис тили фанининг ривожланиш масалалари борасида ўзаро фикр алмашиш имкониятини беради.
Бу йилги анжуман Тошкент шаҳридаги немис тили чуқурлаштирилган тарзда ўқитиладиган ва Германия Федератив Республикасининг «Мактаблар: келажак ҳамкорлари» ташаббуси доирасида қўллаб-қувватланадиган 60-сонли ўрта мактаб биносида бўлиб ўтади.
Немис тили чет тили сифатида Ўзбекистонда бироз кичик, аммо муҳим ва юқори сифатли ўринга эга. Ўзбекистон Республикаси Халқ таълими вазирлигининг маълумотларига кўра ҳозирда мамлакат ўқувчиларининг 4 фоизи немис тилини ўрганмоқда.
Изоҳ (0)