Pentagon rahbari Eshton Karter AQSh Iroq va Suriyada quruqlikda harbiy operatsiyalar o‘tkazishini ma’lum qildi. Mazkur rejalar to‘g‘risida Karter AQSh Senatining qurolli kuchlar bo‘yicha qo‘mitasidagi chiqishida axborot bergan, deya xabar qiladi “RBK”.
“Biz hamkorlarimizning IShID marralariga hujumlarini aviazarbalar yoki quruqlikdagi harakatlar orqali qo‘llab-quvvatlashni davom ettiramiz”, — deya ta’kidlagan Karter.
Pentagon rahbarining aytishicha, IShIDga qarshi kurashda Amerika armiyasi Rakka (terrorchilarning Suriyadagi markazi) va Ramada (Iroqning Anbar provinsiyasi poytaxti) shaharlariga e’tibor qaratadi. U Suriyadagi isyonchilardan yangi qurolli kuchlar tuzish rejasi barbod bo‘lganini tan oldi. Karter AQShning yangicha yondashuvi jangarilarga qarshi kurashayotgan guruhlarning sinovdan o‘tgan yetakchilari bilan ishlash, ularga qurol-yarog‘ berish, harbiy tayyorgarlikdan o‘tkazish hamda havo zarbalari orqali qo‘llab-quvvatlashdan iborat bo‘lishini ma’lum qilgan.
Eslatib o‘tamiz, AQSh IShIDning Suriyadagi marralariga 2014-yil sentabridan beri aviazarbalar berib kelmoqda. Vashington o‘shanda mazkur harbiy amaliyotlar havo hujumlari bilan cheklanishi to‘g‘risida bayonot bergandi.
Izoh (0)