Yerga yaqinlashib kelayotgan “Tungus meteoriti”dan sakkiz karra katta asteroid insoniyat hayotiga xavf solmaydi

Sakkizta “Tungus meteoritlari” Yerga yaqinlashmoqda. “TASS” xabariga ko‘ra, 31-oktabr — 1-noyabr kunlari bir necha soatga Yerning “ikkinchi Oyi” — TV145 asteroidi paydo bo‘ladi.

Rossiyalik olimlarning qayd etishicha, mazkur fazoviy jismlar Yerga hech qanday xavf solmaydi. O‘ziga xos asteroidning osmonda paydo bo‘lishini 1-noyabrga o‘tar kechasi kuzatish mumkin bo‘ladi.

NASA ma’lumotlariga ko‘ra, asteroid Yerdan taxminan 499 ming kilometr uzoqlikdan uchib o‘tadi. Olimlarning hisob-kitobiga ko‘ra, Yerga yaqinlashayotgan asteroid XX asr boshida Sibirga qulagan Tungus meteoritidan taxminan sakkiz barobar katta.

“Tungus meteoritining diametri 60—80 metrni tashkil etgan. Dastlabki ma’lumotlarga ko‘ra, TV145 asteroidining hajmi 280—600 metr oralig‘ida”, — deydi Rossiya Fanlar akademiyasi Astronomiya instituti vakili.