Liviyaning Bengazi shahrida yuz bergan hodisa bo‘yicha AQSh Kongressida ochilgan tinglov 11 soat davom etdi. Bu haqda Meduza xabar bermoqda.
AQSh prezidentligiga nomzod Hillari Klinton respublikachilar rahbarligidagi maxsus qo‘mita oldida 2012-yili Liviyaning Bengazi shahridagi elchixonaga uyushtirilgan hujum yuzasidan berilgan savollarga javob berdi — respublikachilarning fikricha, AQSh Davlat departamenti o‘shanda Liviyadagi amerikaliklarning hayotini saqlab qolish uchun yetarlicha chora ko‘rmagan, departamentning o‘sha vaqtdagi rahbari hisoblangan Hillari Klinton esa elchi Kris Stivensning o‘limiga shaxsan javobgardir.
Bengazi bo‘yicha qo‘mita savollariga javob berarkan, Klinton xonim mazkur hodisa bo‘yicha avval aytgan gaplarini takrorladi. Uning so‘zlariga ko‘ra, elchi Stivens haqiqatan ham elchixonadagi xavfsizlik choralarini kuchaytirishni so‘rab, so‘rovlar yo‘llagan. Biroq ularni xavfsizlik bo‘yicha mutaxassislar ko‘rib chiqqan — mazkur masalalarni hal qilish davlat kotibining vakolatiga kirmaydi. “Bilaman, biz siz eshitishni istagan javob emas, ammo faktlar shunday”, — dedi Klinton.
“Men o‘sha hodisa haqida hammangizni qo‘shib hisoblaganda ham ko‘proq o‘ylaganman. Men o‘sha hodisa sabab hammangizni qo‘shib hisoblaganda ham ko‘proq uyqusiz tunlarni o‘tkazganman. Nima qilish mumkin bo‘lganiyu, nima qilish kerak bo‘lgani haqida tinimsiz bosh qotirganman”, — dedi sobiq davlat kotibi tinglov vaqtida.
Yig‘ilishning aksariyat qismi Hillari xonimning Klintonlar oilasining yaqin do‘sti — Sidni Blyumental bilan munosabatlariga bag‘ishlandi. Sobiq davlat kotibining yaqinda e’lon qilingan yozishmalarida u Blyumental bilan turli masalalar bo‘yicha, xususan, Liviyadagi vaziyat yuzasidan fikr almashgan. Hillari Klintonning qayd etishicha, u Blyumentalga hech qanday maxfiy ma’lumotlarni taqdim etmagan. Vox nashrining qayd etishicha, Blyumentalga e’tibor qaratilgani — Bengazidagi elchixonaga uyushtirilgan hujum muhokamasi aslida vositachi mavzu bo‘lgani, respublikachilar aslida Klintonni obro‘sizlantirish maqsadida mazkur tomoshani uyushtirganiga yorqin dalildir.
AQShning liberal nashrlari Klintonning Bengazi bo‘yicha qo‘mita majlisidagi chiqishlari uning saylovoldi poygasidagi mavqeini yanada mustahkamladi — Klinton kongressmenlar bilan bahslashib, ularni mag‘lub etishga o‘zida kuch va xohish borligini namoyon eta oldi. Qayd etishlaricha, Klinton xonimning so‘roq vaqtidagi bardamligidan va o‘ziga nisbatan ilgari surilgan ayblovlar qarshi qat’iy chidam bilan tura olganini birqator respublikachilar ham yuqori baholadi. “Ochiqchasiga zerikayotgan Klintonning surati uning “so‘rog‘i”ga bag‘ishlangan yig‘ilish bezagiga aylandi”, — deb yozadi Meduza.
Izoh (0)