Nyu-Yorkdagi Aloft Manhattan Downtown mehmonxonasida yangi xizmat ko‘rsatish tizimi joriy etildi. The Daily Mail xabariga ko‘ra, endi mijozlar u yoki bu xizmatni so‘rab, mehmonxona xizmatchilariga ma’lum bir smayl-emodzilar bilan SMS yo‘llashi mumkin.
Buning uchun mehmonxonada maxsus Text it, Get it dasturi ishlab chiqilgan. Xona raqami, mehmonning sharifi va emodzilar ketma-ketligini terib, SMS yo‘llash orqali oltita turli xizmat to‘plamlarini buyurtirish mumkin.
Masalan, ichkilikbozlikdan keyingi boshog‘riqdan aziyat chekayotgan mehmonxona tashrifchilari suv tomchisi, hapdori va banan tasvirini xizmatchilarga yo‘llab, qiymati 10 dollarlik Hangover to‘plamidan foydalanishi mumkin — undan ikki shisha suv, boshog‘riqqa qarshi dori va ikki banan o‘rin olgan.
Shuningdek, Re:Fresh to‘plami yordamida tish cho‘tkasi, pasta, ustara, soqol olish uchun krem va dezodorantga ega bo‘lish mumkin. Sightseer to‘plami esa 10 dollar evaziga metroga yo‘l chiptasi, shahar xaritasi va mehmonxona baridan ikki ichimlik ichish huquqini beradi.
Hozirgi vaqtda mazkur xizmat faqatgina Nyu-Yorkdagi Aloft Manhattan Downtown mehmonxonasida mavjud. Biroq tez orada AQShning boshqa shtatlaridagi, shuningdek, Yevropa va Osiyodagi mehmonxonalarda ham ushbu xizmatlar joriy etilishi rejalashtirilgan.
Izoh (0)