Yapon mafiyasi — yakudzaga mansub “Yamaguti-gumi” sindikati Xellouin munosabati bilan uyushtiriladigan bolalar bayramini bekor qildi. Tashkilotchilar sindikatda sentabr oyida ro‘y bergan bo‘linishdan so‘ng qonli to‘qnashuvlar yuzaga kelishidan xavfsiramoqda. Bu haqda “TASS” xabar berdi.
Bayram bekor qilinishi to‘g‘risidagi e’lon Koba shahridagi “Yamaguti-gumi” ofisi eshiklarida paydo bo‘ldi. Qoldirilish sabablari oshkor etilmagan e’londa “Bayramni sabrsizlik bilan kutgan ota-onalar va bolalarni ta’bini xira qilganimizdan afsusdamiz. Bayram kelgusi yili o‘tkazilishini va’da qilamiz”, deyilgan.
Sentabr oyi boshlanishida yakudzaning eng yirik sindikati bo‘lgan “Yamaguti-gumi”da ixtilof sodir bo‘ldi. Sindikatning bir qismi taxminan 3 ming kishini birlashtirgan “Kobe Yamaguti-gumi” mustaqil uyushmasini tuzdi. Rasmiylar guruhlar o‘rtasida to‘qnashuvlar yuzaga kelishidan xavfsiramoqda, shu sabab politsiya kuchaytirilgan tartibdagi xizmatga o‘tkazilgan, hibsga olishlar amalga oshirilmoqda.
O‘tgan yil oxiridagi ma’lumotlarga ko‘ra, yapon mafiyasining umumiy soni 53 ming kishiga yaqin. “Yamaguti-gumi” 13 ta uyushma va guruhlarni birlashtiradi, barcha yakudzalarning 46 foizi mazkur sindikatga a’zo hisoblanadi.
Yaponiyadagi ko‘plab mafiya guruhlari, garchi politsiya nazorati ostida bo‘lsa-da, oshkora faoliyat yuritadi. Yakudza tez-tez bayram va festivallar o‘tkazib turadi va bu yaxshigina daromad keltiradi.
Izoh (0)