Meksikaning Tinch okeani sohillariga yaqinlashib kelgan beshinchi turkumga oid “Patrisiya” bo‘roni yuqori darajada xavfli bo‘lib, katta vayrongarchiliklarga sabab bo‘lishi mumkin. Bu haqda, “TASS” xabariga ko‘ra, Meksika prezidenti Enrike Penya Neto ma’lum qildi.
Shunga qaramay, davlat rahbarining alohida qayd etishicha, Meksika tabiiy ofat zarbasiga tayyor. Xabar berishlaricha, dastlab Meksikaning Xalisko shtatiga yopiriladigan bo‘ron vaqtida shamol tezligi soniyasiga 90 metrdan 111 metrgacha yetishi kutilmoqda.
“Biz tayyormiz. Bu bo‘ron qanday zarar yetkazishini oldindan aytish qiyin, biroq biz bu qadar katta xavf soladigan bo‘ronga qarshi hech qachon duch kelmaganmiz”, — dedi prezident.
Uning so‘zlariga ko‘ra, agar Saffir-Simpson shkalasi bo‘yicha bo‘ronlarning oltinchi turkumi bo‘lganida, “Patrisiya”ni bemalol shu guruhga kiritsa bo‘lardi. Penya Netoning qayd etishicha, bunday xavf vaqtida “harakatlarni muvofiqlashtirish, birgalikda ishlash va har qanday vaziyatga tayyor turish kerak”.
Meksika hukumati bo‘rondan jiddiy zarar ko‘rishi mumkin bo‘lgan hududlarda aholini ommaviy ravishda ko‘chirmoqda. Tabiiy ofat Meksikaning Xalisko, Kolima, Nayarit, Sakatekas va Koauila shtatlariga yopirilishi va hatto AQSh hududiga qadar yetib borishi taxmin qilinmoqda.
Sohilbo‘yi mintaqalariga minglab harbiylar va qutqaruvchilar yuborilgan, odamlarni qabul qilish uchun 1,7 mingdan ortiq pana joy tayyorlab qo‘yilgan. Xalisko, Kolima va Nayarit shtatlarida 130 kasalxona bo‘ron oqibatida jabrlanganlarga yordam ko‘rsatishga tayyor.
Izoh (0)