Ливиянинг Бенгази шаҳрида юз берган ҳодиса бўйича АҚШ Конгрессида очилган тинглов 11 соат давом этди. Бу ҳақда Meduza хабар бермоқда.
АҚШ президентлигига номзод Ҳиллари Клинтон республикачилар раҳбарлигидаги махсус қўмита олдида 2012 йили Ливиянинг Бенгази шаҳридаги элчихонага уюштирилган ҳужум юзасидан берилган саволларга жавоб берди — республикачиларнинг фикрича, АҚШ Давлат департаменти ўшанда Ливиядаги америкаликларнинг ҳаётини сақлаб қолиш учун етарлича чора кўрмаган, департаментнинг ўша вақтдаги раҳбари ҳисобланган Ҳиллари Клинтон эса элчи Крис Стивенснинг ўлимига шахсан жавобгардир.
Бенгази бўйича қўмита саволларига жавоб бераркан, Клинтон хоним мазкур ҳодиса бўйича аввал айтган гапларини такрорлади. Унинг сўзларига кўра, элчи Стивенс ҳақиқатан ҳам элчихонадаги хавфсизлик чораларини кучайтиришни сўраб, сўровлар йўллаган. Бироқ уларни хавфсизлик бўйича мутахассислар кўриб чиққан — мазкур масалаларни ҳал қилиш давлат котибининг ваколатига кирмайди. «Биламан, биз сиз эшитишни истаган жавоб эмас, аммо фактлар шундай», — деди Клинтон.
«Мен ўша ҳодиса ҳақида ҳаммангизни қўшиб ҳисоблаганда ҳам кўпроқ ўйлаганман. Мен ўша ҳодиса сабаб ҳаммангизни қўшиб ҳисоблаганда ҳам кўпроқ уйқусиз тунларни ўтказганман. Нима қилиш мумкин бўлганию, нима қилиш керак бўлгани ҳақида тинимсиз бош қотирганман», — деди собиқ давлат котиби тинглов вақтида.
Йиғилишнинг аксарият қисми Ҳиллари хонимнинг Клинтонлар оиласининг яқин дўсти — Сидни Блюментал билан муносабатларига бағишланди. Собиқ давлат котибининг яқинда эълон қилинган ёзишмаларида у Блюментал билан турли масалалар бўйича, хусусан, Ливиядаги вазият юзасидан фикр алмашган. Ҳиллари Клинтоннинг қайд этишича, у Блюменталга ҳеч қандай махфий маълумотларни тақдим этмаган. Vox нашрининг қайд этишича, Блюменталга эътибор қаратилгани — Бенгазидаги элчихонага уюштирилган ҳужум муҳокамаси аслида воситачи мавзу бўлгани, республикачилар аслида Клинтонни обрўсизлантириш мақсадида мазкур томошани уюштирганига ёрқин далилдир.
АҚШнинг либерал нашрлари Клинтоннинг Бенгази бўйича қўмита мажлисидаги чиқишлари унинг сайловолди пойгасидаги мавқеини янада мустаҳкамлади — Клинтон конгрессменлар билан баҳслашиб, уларни мағлуб этишга ўзида куч ва хоҳиш борлигини намоён эта олди. Қайд этишларича, Клинтон хонимнинг сўроқ вақтидаги бардамлигидан ва ўзига нисбатан илгари сурилган айбловлар қарши қатъий чидам билан тура олганини бирқатор республикачилар ҳам юқори баҳолади. «Очиқчасига зерикаётган Клинтоннинг сурати унинг «сўроғи»га бағишланган йиғилиш безагига айланди», — деб ёзади Meduza.
Изоҳ (0)