Германияга бориш умидида Будапештга йўл олган бир неча қочоқни тепгани, яна бирини оёғидан чалгани учун N1TV каналидан бўшатилган ва таъқибга учраган венгриялик журналист Петра Ласло Россияга кўчиб ўтишга тайёрлигини билдирди. Бу ҳақда у «Известия» газетасига берган интервьюсида маълум қилган.
Журналист аёлга нисбатан «Безорилик» моддаси билан иш очилган. Махсус тайинланган комиссия Ласло учун етти йиллик қамоқ жазоси сўраган, унинг ўзи эса шартли жазо берилишидан умид қилмоқда. «Шуни аниқ айтишим мумкинки, ҳаётим остин-устун бўлиб кетди. Энди ишга жойлашишим ва севимли касбим билан шуғулланишим даргумон», — дея ҳикоя қилган у.
Петра Facebook билан ҳам судлашиш ниятида. Унинг айтишича, ижтимоий тармоқда уни жазолашга чақирувчи аккаунтлар ва гуруҳлар очилган, ҳатто ўлдирилиши учун 20 минг доллар мукофот ҳам ваъда қилинган. Тармоққа мурожаатидан сўнг эса фақат уни ёқловчи гуруҳлар олиб ташланган.
Эслатиб ўтамиз, Ласло билан боғлиқ ҳодиса 8 сентябрда Венгриянинг Сербия билан чегарасидаги Роске шаҳрида бўлиб ўтган. Журналист аёл оёғидан чалган 52 ёшли суриялик муҳожир Абдул Муҳсин кейинчалик Испаниянинг «Хетафе» футбол клуби мураббийи этиб тайинланди.
Изоҳ (0)