O‘zbekistonlik taekvondochi Dmitriy Shokin Manchester Gran-prisida g‘olib chiqdi

Angliyaning Manchester shahrida taekvondo WTF bo‘yicha yilning nufuzli musobaqalaridan biri – Manchester Gran-Prisi boshlandi. OlamSport xabariga ko‘ra, musobaqaning ilk kuni 87 kilogrammdan og‘ir vazn toifasida g‘olib va sovrindorlar aniqlandi.

Xabar berishlaricha, musobaqaning birinchi kunida amaldagi jahon chempioni hisoblangan o‘zbekistonlik Dmitriy Shokin barcha raqiblarini mag‘lubiyatga uchratib, Gran-Pri g‘olibiga aylandi.

U finalga qadar koreyalik Ju Xo Chxolni 16:4, shuningdek, ikki eronlik taekvondochini mag‘lub etdi. Finalda esa kubalik raqibini oltin ochko evaziga taslim etib, Gran-Pri g‘olibiga aylandi.

Ushbu muhim g‘alaba Dmitriy Shokinga 40 reyting ochkosi hamda 5000 AQSh dollarini taqdim etdi.

Mazkur g‘alabadan so‘ng Shokin reytingda birinchi o‘ringa ko‘tarilib oldi. Shu paytgacha reytingda peshqadamlik qilib kelgan Jasur Boyqo‘ziyev esa, aksincha, ikkinchi o‘ringa pastladi.

Boyqo‘ziyev Manchester Gran-Prisining ikkinchi davrasida belaruslik sportchiga 5:6 hisobida yutqazib qo‘ydi. 17-oktabr kuni yana ikki nafar o‘zbekistonlik sportchi — aka-uka Maksim va Nikita Rafalovich dayanga chiqadi.

Eslatib o‘tamiz, musobaqada oltin medal sohibi 40 reyting ochkosiga, kumush medal sovrindori 30, uchinchi o‘rinni egallagan sportchilar esa 20 reyting ochkosiga ega bo‘ladi.

Ma’lumot uchun, Jahon Gran-Prisi to‘rtta yirik musobaqadan iborat bo‘lib, birinchi turnir Moskva shahrida, ikkinchi musobaqa Turkiyaning Samsun shahrida o‘tkazildi. Jahon Gran-Prisining yakuniy final musobaqasi dekabrda Meksikada bo‘lib o‘tadi.