Англиянинг Манчестер шаҳрида таэквондо WTF бўйича йилнинг нуфузли мусобақаларидан бири – Манчестер Гран-Приси бошланди. OlamSport хабарига кўра, мусобақанинг илк куни 87 килограммдан оғир вазн тоифасида ғолиб ва совриндорлар аниқланди.
Хабар беришларича, мусобақанинг биринчи кунида амалдаги жаҳон чемпиони ҳисобланган ўзбекистонлик Дмитрий Шокин барча рақибларини мағлубиятга учратиб, Гран-При ғолибига айланди.
У финалга қадар кореялик Жу Хо Чхолни 16:4, шунингдек, икки эронлик таэквондочини мағлуб этди. Финалда эса кубалик рақибини олтин очко эвазига таслим этиб, Гран-При ғолибига айланди.
Ушбу муҳим ғалаба Дмитрий Шокинга 40 рейтинг очкоси ҳамда 5000 АҚШ долларини тақдим этди.
Мазкур ғалабадан сўнг Шокин рейтингда биринчи ўринга кўтарилиб олди. Шу пайтгача рейтингда пешқадамлик қилиб келган Жасур Бойқўзиев эса, аксинча, иккинчи ўринга пастлади.
Бойқўзиев Манчестер Гран-Присининг иккинчи даврасида беларуслик спортчига 5:6 ҳисобида ютқазиб қўйди. 17 октябрь куни яна икки нафар ўзбекистонлик спортчи — ака-ука Максим ва Никита Рафалович даянга чиқади.
Эслатиб ўтамиз, мусобақада олтин медаль соҳиби 40 рейтинг очкосига, кумуш медаль совриндори 30, учинчи ўринни эгаллаган спортчилар эса 20 рейтинг очкосига эга бўлади.
Маълумот учун, Жаҳон Гран-Приси тўртта йирик мусобақадан иборат бўлиб, биринчи турнир Москва шаҳрида, иккинчи мусобақа Туркиянинг Самсун шаҳрида ўтказилди. Жаҳон Гран-Присининг якуний финал мусобақаси декабрда Мексикада бўлиб ўтади.
Изоҳ (0)