Xitoyning Poly Group korporatsiyasi O‘zbekistonda kauchuk zavodi qurishga kirishdi

Xitoyning Poly Group korporatsiyasi “Angren” maxsus industrial zonasida kauchuk zavodi qurishga kirishdi. Bu haqda “Review.uz” xabar bermoqda.

Korporatsiya salkam 6 yil davom etgan muzokaralardan so‘ng O‘zbekistonda kauchuk zavodi qurish uchun sherik sifatida tanlangan edi: 2014-yil avgustida “O‘zkimyosanoat” aksiyadorlik jamiyati va Poly Group  o‘rtasida salkam 184 million dollarlik shartnoma imzolandi.

Mazkur shartnomaga binoan korporatsiya har yili yengil mashinalar uchun 3 millionta pokrishka, 200 000 ta qishloq xo‘jaligida ishlatiladigan diagonal shinalar, shuningdek, uzunligi 100 000 metr transporter lentalar ishlab chiqaradigan zavod qurishi va foydalanishga topshirishi ko‘zda tutilgan.

O‘tgan yil oktabrida korporatsiya mutaxassislari O‘zbekistonda ikki hafta bo‘lib, qurilish rejalarini muhokama qilgan, dekabrda esa prezident Islom Karimovning “Angren” MIZ hududida kauchuk zavodi qurish to‘g‘risidagi farmoni e’lon qilingan edi.