FIFAning etika bo‘yicha qo‘mitasi yaqin ikki-uch hafta ichida tashkilot rahbari Yozef Blatterga nisbatan qaror qabul qilishni rejalashtirmoqda. Bu haqda “TASS” xabar bermoqda.
Shveysariya federal adliya byurosi 25-sentabr kuni Blatterga nisbatan jinoyat ishi ochdi — FIFA rahbari UEFA prezidenti Mishel Platiniga noqonuniy ravishda ikki million Shveysariya frankini o‘tkazib berganlikda gumon qilinmoqda.
8-oktabr, payshanba kuni FIFAning etika bo‘yicha qo‘mitasi Blatterni, tashkilot bosh kotibi Jerom Valkeni va UEFA rahbari Mishel Platinini 90 kunga milliy va xalqaro darajada futbol bilan bilan bog‘liq har qanday faoliyatdan chetlatdi.
FIFA rahbari vazifasini vaqtinchalik bajaruvchi etib Afrika futbol konfederatsiyasi prezidenti va FIFA katta vitse-prezidenti Issa Ayatu tayinlandi. Shunga qaramay, FIFA ijroiya qo‘mitasining 20-oktabrda bo‘ladigan favqulodda majlisida tashkilotga vaqtinchalik rahbarlik qiluvchi boshqa odam tayinlanishi mumkin.
Blatterning o‘zi esa “kurashsiz taslim bo‘lmasligini”ni ma’lum qildi. “Men — jangchiman. Ular meni yo‘q qilishlari mumkin, biroq butun hayotimni bag‘ishlagan ishimni yo‘q qila olishmaydi”, — dedi 79 yoshli shveysariyalik.
Izoh (0)