“Kasperskiy laboratoriyasi” ekspertlari “VKontakte” ijtimoiy tarmog‘idagi akkauntlar Android operatsion tizimi uchun mo‘ljallangan mobil dastur orqali ommaviy ravishda o‘g‘irlanganini aniqladi. Bu haqda TJ xabar bermoqda.
Ekspertlarning ma’lumotlariga ko‘ra, axborot o‘g‘irlanishi o‘zida zararlovchi kod bo‘lgan “Muzika VKontakte” mobil dasturi orqali amalga oshirilgan. Biroq foydalanuvchilar yuz bergan o‘g‘rilikdan bexabar qolgan, chunki dastur o‘zining asosiy vazifasi — ijtimoiy tarmoqdan qo‘shiq qo‘yishni odatiy tartibda bajargan.
Ma’lumotlarni o‘g‘irlash holati foydalanuvchi o‘z akkaunti ma’lumotlarini mobil dasturga kirish vaqtida kiritganida yuz bergan. Ekspertlarning fikricha, mobil dasturning zararli harakatlari yuz minglab foydalanuvchilarni qamrab olgan bo‘lishi mumkin.
Google mobil dasturning barcha versiyalarini blok qilgan, biroq bu ish biroz sust olib borilgan. Dasturning 4-oktabr kuni e’lon qilingan so‘nggi versiyasi 100 mingdan ortiq marta yuklab olingan, 500 ga yaqin foydalanuvchi esa unga besh yulduz bahosini qo‘ygan.
“Kasperskiy laboratoriyasi”ning bildirishnomasidan so‘nggina Google Play ma’muriyati zararli kodi bor “Muzika VKontakte” mobil dasturini internet-do‘kondan to‘liq o‘chirib tashlagan.
Izoh (0)