Norvegiyaning Telenor kompaniyasi MDH, Italiya, Osiyo va Afrikaning qator davlatlarida telekommunikatsiya biznesi bilan shug‘ullanadigan VimpelCom xoldingining o‘ziga tegishli 33% aksiyalar paketini sotishga qaror qildi. Kompaniya prezidenti Sigve Brekke Telenor asosiy aktivlarini rivojlantirishga e’tibor qaratish niyatida ekanligini ma’lum qilgan. Bu haqda “RBK” xabar bermoqda.
VimpelCom faoliyatidagi ishtiroki davomida Telenor xoldingga 15 milliard Norvegiya kroni (taxminan 1,8 milliard dollar) miqdorida investitsiya kiritgan va 20 milliard kron (2, 4 milliard dollar) dividend olgan.
Telenor o‘ziga tegishli VimpelCom aksiyalari paketini 20 milliard kron (2, 4 milliard dollar) baholamoqda. Oldi-sotdi jarayoni qachon yakuniga yetishi hozircha noma’lum. Norvegiya kompaniyasi rahbariyati aksiyadorlar manfaatini himoya qilish uchun bu boradagi barcha takliflarni sinchiklab ko‘rib chiqishi xabar qilingan.
Izoh (0)