Saudiya Arabistonining Flynas aviakompaniyasi qozog‘istonlik hojilarni vataniga eltish uchun atigi bitta samolyot ajratgani sabab, Qozog‘istonning yuzlab fuqarolari Jidda aeroportida bir necha kunga qolib ketgan. Bu haqda “Nur.kz” xabar bermoqda.
Qayd etishlaricha, joriy Haj mavsumida Saudiya Arabistoniga safar qilgan 5 ming qozog‘istonlikni 2,5 ming nafariga Saudiya Arabistonining Flynas va Qozog‘istonning SCAT aviakompaniyalari xizmat ko‘rsatishi kerak edi.
Biroq, ma’lum qilinmagan sabablarga ko‘ra, SCAT parvozlardan chetlatilgan, Flynas esa birgina samolyot bilan 2,5 ming kishini “Saudiya Arabistoni — Qozog‘iston” yo‘nalishi bo‘ylab manzilga yetkazishga majbur bo‘lmoqda.
Avvalroq Qozog‘iston musulmonlari diniy idorasi (QMDI) Saudiya aviakompaniyasi Oy taqvimiga ko‘ra faqat ma’lum kunlarda parvoz qilishi haqida izoh bergandi. “Qizig‘i, boshqa ziyoratchilar uchun kompaniya samolyotlari qat’iy jadval asosida, xalqaro vaqt standarti bo‘yicha uchmoqda”, — deydi Qozog‘iston sayyohlik agentliklari assotsiatsiyasi prezidenti Asel Nurkebayeva.
Nurkebayevaning qo‘shimcha qilishicha, Flynas aviakompaniyasi qozog‘istonlik ziyoratchilarning mehmonxona va oziq-ovqat xarajatlarini qoplab bermoqchi emas, vaholanki, xalqaro norma va kelishuvlar buning aksini talab qiladi. Bu kabi holat boshqa takrorlanmasligi uchun, assotsiatsiya Haj kvotasi taqsimotini QMDIdan olib qo‘yishni taklif qilmoqda.
QMDIdan ma’lum qilishlaricha, Saudiya Arabistonida qolayotgan qozog‘istonlik ziyoratchilar uzog‘i bilan 12-oktabrgacha vatanda bo‘ladi. “5-oktabr kuni Jiddadan 464 kishi keladi, qolgan 1340 kishi esa Madinadan Olmaotaga uchadi, so‘nggi reys 12-oktabrda”, — dedi idora vakili.
Izoh (0)