Britaniyaning Koventri shahrida ikki qavatli yo‘lovchi avtobusi supermarket binosiga borib urilishi natijasida ikki kishi halok bo‘ldi, olti kishi tan jarohati oldi. Bu haqda BBC News xabar bermoqda.
Hodisa 3-oktabr, shanba kuni mahalliy vaqt bilan 18:00 da shahar markazidagi gavjum ko‘chada yuz berdi. “Yo‘lovchi avtobusi bir necha avtomobilni urib, simyog‘ochni qo‘porib, supermarket binosiga borib urildi”, — deya xabar bermoqda The Coventry Telegraph.
Yo‘l-transport hodisasi natijasida jami sakkiz kishi jabrlangan bo‘lib, oxir-oqibat ularning ikki nafari — avtobusning ikkinchi qavatida bo‘lgan sakkiz yashar bola va 70 yoshli piyoda ayol vafot etgan. Jabrlanuvchilarning biri — to‘qqiz yoshli qizcha og‘ir ahvolda kasalxonaga yotqizilgan, qolgan jabrlanuvchilar yengil shikastlangan.
Hodisa joyida shoshilinch xizmatlarning xodimlari ish olib bordi, huquqni muhofaza qiluvchi idoralarning vakillari yondosh ko‘chalarni yopib qo‘ydi. “Tergovchilar hodisa tafsilotlarini o‘rganmoqda, hozircha hech kim hibsga olingani yo‘q”, — deydi politsiya vakili.
Izoh (0)