AQShning Kaliforniya shtatidagi Tuolomni shahri politsiyasi to‘rt o‘smirni o‘zi o‘qiydigan maktabiga qurolli hujum uyushtirishni rejalashtirganlikda gumon qilib, hibsga oldi. Bu haqda “TASS” xabar bermoqda.
Mahalliy politsiya vakili so‘zlariga ko‘ra, sentabr oxirida shahar maktablaridan birining xodimlari bir necha o‘smir maktab o‘qituvchilari va boshqa o‘quvchilarga hujum qilish haqida o‘ylayotganini ma’lum qilgan.
Politsiya mazkur holat yuzasidan surishtiruv o‘tkazib, to‘rt o‘quvchi aynan shu maqsadda til biriktirganini aniqladi. Ular hujum qurboni bo‘ladigan o‘qituvchi va o‘quvchilarning ro‘yxatini tuzib, niyatni amalga oshirishda o‘qotar quroldan foydalanmoqchi bo‘lgan.
Hibsga olingan o‘smirlarning shaxsi hozircha ma’lum qilinmayapti. Mahalliy politsiya vakillarining ma’lum qilishicha, o‘quvchilar aniq bir harakatni amalga oshirishga ulgurmagan, o‘smirlarni hibsga olish vaqtida hech kim jabrlanmagan.
Izoh (0)