Checheniston rahbari Ramzan Qodirov Moskva markazida o‘ldirib ketilgan siyosiy arbob Boris Nemsovning qizini mehmonga taklif qilib, unga hamdardlik bildirishga tayyor ekanligini ma’lum qildi. Bu haqda “Gazeta.ru” xabar bermoqda.
“U meni ayblaguncha, qotillikni uyushtirganlarni o‘z atrofidan qidirsin. Agar men bilan uchrashishni xohlasa, mayli, men uni mehmonga chaqiraman, birga choy ichamiz, men unga otasini o‘ldirib ketishgani uchun hamdardlik bildiraman. Mening otamni ham o‘ldirishgan — hayot shunaqa ekan, nima ham qila olamiz”, — dedi u.
Checheniston rahbari, agar Rossiya Tergov qo‘mitasi talab qilsa, so‘roqqa ham tayyor ekanligini ma’lum qildi, ayni vaqtda Chechenistonning “Sever” bataloni qo‘mondoni o‘rinbosari Zaur Dadayevning mazkur qotillikka aloqador ekanligini ishonmasligini alohida ta’kidladi.
Rossiya muxolifati vakili Boris Nemsov 28-fevral kuni Moskva markazida otib, o‘ldirib ketilgan edi. 2015-yil avgustida Nemsovning qizi — Janna Nemsova Ramzan Qodirovni tergov qilishdan bosh tortgan tergovchilar ustidan shikoyat qilgani ma’lum bo‘lgandi.
Izoh (0)