Ўзбекистон Футбол Федерацияси президенти Мираброр Усмонов Ўзбекистон клублари ўртасидаги мусобақалар регламентига келишилган ўйинларга қарши курашиш бўйича алоҳида банд киритишни таклиф қилди. Бу ҳақда ЎФФ матбуот хизмати хабар бермоқда.
«Федерация раҳбари Ўзбекистон клублари ўртасидаги мусобақалар регламентига келишилган ўйинларга қарши курашиш бўйича алоҳида банд киритиш ва умуман уни 2016 йилдан бошлаб қайтадан тузиб чиқиш ташаббуси билан чиқиб, бу борада ЎФФ Бош котиби Сардор Раҳматуллаев ва ПФЛ директори Фарҳод Магаметовга топшириқ берди», — дейилади ЎФФ матбуот хизмати хабарида.
«Регламентда айрим масалалар очиқ қолиб кетган ва биз юзага келган шу вазиятларни инобатга олиб, бугун биз гапираётган мавзуга алоқадорлиги аниқланган шахсларга қўлланиладиган жазо чораларини кучайтиришимиз керак. Керак бўлса, клубни қуйи лигага тушириб юбориш, очколарини олиб ташлаш, унвонлардан маҳрум этиш масаласини ҳам киритишимиз керак», — дейди Усмонов.
Эслатиб ўтамиз, футбол бўйича Ўзбекистон Олий Лигаси доирасида 25 сентябрь куни ўтказилган «Пахтакор» — «Металлург» (3:2) учрашувининг сўнгги дақиқалари ЎФФ томонидан спорт принсиплари ва этикасига зид деб топилиб, «Металлург» бош мураббийи Рустам Мирсодиқовнинг лицензияси 2015 йил охирига қадар бекор қилингани футбол жамоатчилиги ўртасида шов-шувларга сабаб бўлганди.
ЎФФ президенти «Пахтакор» — «Металлург» учрашувида рўй берган воқеаларни «катта шармандалик» деб атаб, 2015 йилги мавсум якунларига кўра «Пахтакор» футбол клуби қаттиқ жазоланиши, келишилган ўйинларни ташкил этишда гумон қилинаётган футбол клубларининг «катта раҳбарлари»га нисбатан чоралар кўрилишига ваъда берди.
Изоҳ (0)