Kataloniyada 27-sentabr, yakshanba kuni mahalliy parlamentga saylovlar boshlandi. Aslida bunda gap deputatlarni saylash haqida borsa ham, millatchilik partiyalari ushbu saylovlarni mintaqa mustaqilligi masalasi bo‘yicha yangi plebissit (referendum) deb e’lon qildi, deb yozadi Reuters.
G‘oliblik uchun ikki ayirmachi partiya — hukmron CDC hamda so‘l ERC nomzodlarning yagona ro‘yxatini taqdim etdi. Partiyalar birlashgan holda 135 o‘rinli parlamentda kamida 68 ta o‘ringa ega bo‘lishni ko‘zlamoqda. Bunday natija ularga hukumatni shakllantirib, qonunchilikni o‘zgartirish imkonini beradi.
Nashr eslatishicha, 2014-yil noyabrida ham Kataloniyada referendum o‘tkazilgan, unda 80 foiz ishtirokchilar mustaqillik uchun ovoz bergandi.
O‘z navbatida, Madrid bunday referendumlar yuridik jihatdan kuchga ega emasligini, chunki qaysidir hududning davlat tarkibidan chiqishi haqidagi qarorni nafaqat uning aholisi, balki butun Ispaniya fuqarolari qabul qilishi kerakligini ta’kidlagan.
Izoh (0)