Xorijiy mamlakatlardagi muzlatilgan hisob-raqamlari faollashtirilganidan so‘ng, Eron 2016-yil boshida 29 milliard dollarni qo‘lga kiritadi. Bu haqda Eron Markaziy banki boshqaruvi raisi o‘rinbosari G‘ulom Ali Kamyob ma’lum qildi, deya xabar bermoqda “RBK”.
Bloomberg agentligining qayd etishicha, turli mamlakatlarda joylashgan mazkur mablag‘ning 23 milliard dollari Eron Markaziy bankiga tegishli, qolgan 6 milliardi esa — davlat mulki. Kamyobning so‘zlariga ko‘ra, mablag‘ning yakuniy miqdori bundan ham ko‘p bo‘lishi mumkin, biroq o‘rtacha raqamlar shunday.
2015-yilning iyul oyida Tehron va xalqaro vositachilarning oltiligi Eron yadroviy dasturi bo‘yicha kelishuvga erishgani munosabati bilan, Eronning xorijiy mamlakatlardagi aktivlari faollashtiriladi. Bloomberg’ning qayd etishicha, Eronning xorijdagi aktivlarini faollashtirish masalasi kelishuv tanqidchilarining asosiy nuqtasi bo‘lib turibdi.
Xususan, AQSh kongressining ba’zi a’zolari Eron bu pullarni AQShning mintaqadagi hamkorlariga nisbatan g‘arazli kayfiyatda bo‘lgan o‘z ittifoqchilarini mustahkamlash uchun sarflaydi, degan xavotirda. Eronning o‘zi esa mazkur mablag‘lar turli sohalarga, xususan, neft-kimyo va gaz sanoatiga, tog‘-kon sanoatiga, yo‘llar va qurilishga sarflanishini ma’lum qilmoqda.
Izoh (0)