Germaniya politsiyasi 1989-yildan beri o‘ldirilgan deb hisoblab kelinadigan ayol aslida hayot ekanligini aniqladi. Bu haqda Interfax xabar bermoqda.
Politsiya ma’lumotlariga ko‘ra, 24 yoshli Petra Pashitka 1984-yil, 26-iyulda Braunshveyg shahridagi o‘zi yashab turgan talabalar yotoqxonasidan chiqib ketgan va dom-daraksiz yo‘qolgan. Oradan besh yil o‘tgach, politsiya uni o‘lgan deb topgan, qizning o‘limida aybdor deb hisoblangan odam esa jinoyatni bo‘yniga olgan.
Yaqinda o‘g‘irlik bo‘yicha surishtiruv olib borayotgan politsiya Dyusseldorfdagi kvartiralardan birida ijarada turgan, hech qanday hujjatlarga ega bo‘lmagan 55 yoshli ayolga duch keldi. U boshqa ism-sharif ostida yashayotganini tan olib, aslida kim ekanligini aytgan.
Ma’lum bo‘lishicha, 1984-yili talaba qiz to‘satdan g‘oyib bo‘lishga tayyorgarlik ko‘rib, bankdagi bor pullarini olgan (4 ming doychmarka, 2 ming yevro atrofida) va boshqa nom bilan yangi hayot boshlashga qaror qilgan.
Qarindoshlari tirik ekanligidan xabar topgach, u bilan ko‘rishishni istadi, biroq ayol bundan bosh tortdi.
Izoh (0)