2015-yil haj amalini bajarish baxtiga muyassar bo‘lgan o‘zbekistonliklar qatorida Toshkent shahridan 750 nafar ziyoratchi ham bor, deb yozadi Din ishlari bo‘yicha qo‘mita rasmiy sayti.
“Ular poytaxt aeroportidan Madina shahriga samolyotlarda yetib keldi. Madinai munavvarada hojilar ishchi guruh tomonidan kutib olinib, mehmonxonaga joylashtirildi. Hojilar hordiq chiqarganlaridan so‘ng, Nabiy alayhissalomning qabrlarini ziyorat qildi”, — deyiladi Din ishlari bo‘yicha qo‘mita rasmiy saytidagi xabarda.
“Madinadai Munavvarada poytaxtimiz ziyoratchilari ‘Baqi’’ qabristoni, ‘Qubo’ va ‘Qiblatayn’ masjidlari va Uhud tog‘i yonidagi qadamjoni ziyorat qildi. Ushbu qadamjolar haqida guruh rahbarlari tomonidan hojilarga batafsil ma’lumotlar berildi. Ziyoratchilarimiz Madina shahrida barcha namozlarni Masjidu Nabaviyda o‘qishga harakat qildi. Mazkur masjidda o‘qilgan bitta namoz boshqa joylardagi mingta namozdan yaxshidir”, — deyiladi xabarda.
Safarning to‘rtinchi kuni toshkentlik ziyoratchilar “Zulhulayfa” miyqotida umra uchun niyat qilib, ehromga kirdi va Makka shahri tomon otlandi. Yo‘l davomida guruh rahbarlari o‘z guruhidagilarga haj amallari to‘g‘risida ma’lumotlar berdi. Ular Makka shahriga kelgach, mehmonxonaga joylashdi. So‘ngra, umra ibodatini ado qildi.
“Toshkent shahri ziyoratchilari Madinada Rasulullohning qabrlari, hazrati Abu Bakr Siddiq, Hazrati Umar ibn Xattob va Baqi’ qabristoni, Uhud tog‘i etagidagi Hazrati Hamza va boshqa sahobalarning qabrlarini ziyorat qildi. Islom tarixida birinchi qurilgan ‘Qubo’ masjidida namoz o‘qidi.
Toshkent shahridan kelgan ziyoratchilarimiz bugungi kunda Mino vodiysiga borib, bevosita haj amallarini bajarishga ixlos bilan tayyorgarlik ko‘rmoqda”, — deb yakunlanadi Din ishlari bo‘yicha qo‘mita rasmiy sayti xabari.
Izoh (0)