2015 йил ҳаж амалини бажариш бахтига муяссар бўлган ўзбекистонликлар қаторида Тошкент шаҳридан 750 нафар зиёратчи ҳам бор, деб ёзади Дин ишлари бўйича қўмита расмий сайти.
«Улар пойтахт аэропортидан Мадина шаҳрига самолётларда етиб келди. Мадинаи мунавварада ҳожилар ишчи гуруҳ томонидан кутиб олиниб, меҳмонхонага жойлаштирилди. Ҳожилар ҳордиқ чиқарганларидан сўнг, Набий алайҳиссаломнинг қабрларини зиёрат қилди», — дейилади Дин ишлари бўйича қўмита расмий сайтидаги хабарда.
«Мадинадаи Мунавварада пойтахтимиз зиёратчилари ‘Бақиъ’ қабристони, ‘Қубо’ ва ‘Қиблатайн’ масжидлари ва Уҳуд тоғи ёнидаги қадамжони зиёрат қилди. Ушбу қадамжолар ҳақида гуруҳ раҳбарлари томонидан ҳожиларга батафсил маълумотлар берилди. Зиёратчиларимиз Мадина шаҳрида барча намозларни Масжиду Набавийда ўқишга ҳаракат қилди. Мазкур масжидда ўқилган битта намоз бошқа жойлардаги мингта намоздан яхшидир», — дейилади хабарда.
Сафарнинг тўртинчи куни тошкентлик зиёратчилар «Зулҳулайфа» мийқотида умра учун ният қилиб, эҳромга кирди ва Макка шаҳри томон отланди. Йўл давомида гуруҳ раҳбарлари ўз гуруҳидагиларга ҳаж амаллари тўғрисида маълумотлар берди. Улар Макка шаҳрига келгач, меҳмонхонага жойлашди. Сўнгра, умра ибодатини адо қилди.
«Тошкент шаҳри зиёратчилари Мадинада Расулуллоҳнинг қабрлари, ҳазрати Абу Бакр Сиддиқ, Ҳазрати Умар ибн Хаттоб ва Бақиъ қабристони, Уҳуд тоғи этагидаги Ҳазрати Ҳамза ва бошқа саҳобаларнинг қабрларини зиёрат қилди. Ислом тарихида биринчи қурилган ‘Қубў масжидида намоз ўқиди.
Тошкент шаҳридан келган зиёратчиларимиз бугунги кунда Мино водийсига бориб, бевосита ҳаж амалларини бажаришга ихлос билан тайёргарлик кўрмоқда», — деб якунланади Дин ишлари бўйича қўмита расмий сайти хабари.
Изоҳ (0)