Nyu-Yorkda istiqomat qiluvchi Denni Uilerning smartfoniga 14-sentabr kuni uning xonadonini o‘g‘rilar o‘marayotgan bo‘lishi mumkinligi haqida bildirishnoma keldi. TJ’ning yozishicha, uning telefoniga haqiqatan ham o‘sha vaqtda uyni tunayotgan noma’lum shaxslarning suratlari kelib tushgan.
Uyni o‘marish tasvirlangan besh daqiqalik videoyozuv Uiler tomonidan YouTube’da e’lon qilindi va ikki kun ichida 40 ming martadan ortiq ko‘rildi. Unda jinoyatchilar uyga deraza orqali kirganini ko‘rish mumkin.
Bildirishnoma va tasvir Canary orqali — uy xavfsizligi uchun mo‘ljallangan qurilma va unga tegishli mobil dastur orqali olingan. U, xonadon ichida shubhali harakatni sezishi bilan, foydalanuvchilarga xonadondan onlayn-videoni ko‘rish imkonini beradi va bildirishnoma yuboradi. Canary’dan foydalanishning bir yillik qiymati 24—149 dollar oralig‘ida.
Qurilma tartibbuzarlik yuz berganini aniqlashi bilan uy egasiga mazkur holat haqida huquq-tartibot vakillariga xabar berish yoki o‘g‘rini jinoyatdan tiyilishga majbur qilishi mumkin bo‘lgan trevoga signalini ishga tushirishi mumkin.
Uiler birinchi variantni tanlab, darhol uyiga yo‘l olgan, biroq uyga yetib kelgan vaqtda o‘g‘rilar umumiy qiymati 500 dollar bo‘lgan bir necha qimmatbaho bilaguzuklarni o‘g‘irlab, yashirinishga ulgurgan. Jinoyatchilarni qo‘shni klub xodimi ko‘rib qolgan va yong‘in zinasidan tushib kelayotganlar haqida baqir-chaqir qilib xabar bergan. Jabrlanuvchi Canary yordamida olingan tasvirlarni politsiyaga taqdim etgan, o‘z navbatida politsiya xodimlari tasvirdagi odamlar boshqa o‘g‘rilik ishlari bo‘yicha ham gumonlanuvchilar qatorida ekanligini ma’lum qilgan.
YouTube’dagi video ostida o‘z fikri bilan o‘rtoqlashgan foydalanuvchilarning fikricha, xonadonni o‘g‘rilikdan mobil dastur emas, balki hushyor qo‘shni saqlab qolgan, qurilmadagi signal esa juda kech ishga tushgan. Ba’zilar esa, videodagi jinoyatchilarning na qo‘lqopi va na niqobi borligiga ishora qilib, uning haqiqiy o‘g‘rilik ekanini shubha ostiga olgan.
Izoh (0)