Rossiyada ishlovchi jarroh Paolo Makkiarini odam boshini ko‘chirib o‘tkazish bo‘yicha operatsiyani nima uchun amalga oshirib bo‘lmasligi haqidagi fikrlari bilan o‘rtoqlashdi. Bu haqda “Gazeta.ru” xabar bermoqda.
Avvalroq Italiyada istiqomat qiluvchi bir jarroh boshni ko‘chirib o‘tkazish bo‘yicha jarrohlik amaliyotini amalga oshirishni rejalashtirayotganini ma’lum qilgandi.
“Bunday operatsiyani qanday qilib tasavvur qilish mumkin axir? Shaxsan mening fikrimcha, u jinoyatchi. Birinchidan, buning uchun hech qanday ilmiy asos yo‘q. Ikkinchidan, bu transgumanizm olamiga mansub hodisa... Qanday qilib bir odamning miyasi boshqa bir tanaga qo‘shilishi bilan o‘z-o‘zidan ishlab ketishi mumkin?”, — dedi Makkiarini.
“U hatto orqa miya va asab tizimi o‘rtasidagi uzilgan qismlarni bog‘lashni o‘rganib olgan deb tasavvur qilinganida ham, nima uchun uning bu uslubi, masalan, falaj bo‘lib qolgan bemorlarga nisbatan qo‘llanilmayapti?”, — deya savol bilan murojaat qildi Rossiyada mehnat qilayotgan jarroh.
“Men bu operatsiya haqida birinchi marta Germaniyadaligimda eshitgandim, aniqrog‘i, bu haqda sariq matbuotda o‘qigandim. Gazetada uning surati bor edi, u tabassum qilib turardi: ‘Buni qilaman, bunday qilaman va keyin unday qilaman’, deb aytgandi”, — dedi Makkiarini.
“Keyinroq bir rossiyalik uning bu operatsiyasida ko‘ngilli ravishda ishtirok etmoqchi ekanligini eshitdik. O‘shanda: ‘Bu odam yo ahmoq, yoki butun xavf-xatarni his qilmayapti’, deb o‘yladim. Bu operatsiyaga ruxsat bermaslik kerak, deb hisoblayman. Bu axloq jihatdan ham nomaqbuldir. 100 yildan keyin shunday operatsiyalar qilish mumkindir, biroq hozir — buning turgan-bitgani safsata”, — deya qo‘shimcha qildi Makkiarini.
Izoh (0)