Britaniya parlamentining quyi palatasi tuzalishiga umid bo‘lmagan bemorlar uchun evtanaziya — ixtiyoriy o‘limga ruxsat berilishini ko‘zda tutuvchi qonun loyihasini ma’qullamadi. Bu haqda The Guardian ma’lumotlariga asoslanib, “Yevropeyskaya pravda” xabar bermoqda.
Ushbu qonun loyihasini yoqlab 118 nafar parlament a’zosi ovoz berdi, 330 nafar deputat esa qarshi bo‘ldi. Qonun loyihasini Leyboristlar partiyasidan Rob Marris taklif qilgan. Unda shifokorlar xulosasiga ko‘ra, yashashiga yarim yildan kam qolgan bemorlarga hayotdan ixtiyoriy ketishiga ruxsat berish taklif etilgandi.
Buyuk Britaniya bosh vaziri Devid Kemeron ham evtanaziyaga ruxsat berilishiga qarshi chiqdi. “Bosh vazir bu masalada shoshilinch qadamlar qo‘yilmasligi lozim deb hisoblaydi va evtanaziyaga yaqinlashtiruvchi harakatlarni yoqlamaydi”, — deya ma’lum qilingan hukumat rahbarining ofisida.
Izoh (0)