O‘zbekiston Milliy kutubxonasida Aleksandr Kuprin tavalludining 145 yilligiga bag‘ishlangan ko‘rgazma ochildi

O‘zbekiston Milliy kutubxonasida 7-sentabr kuni rus klassik adabiyotining yorqin namoyondasi, yozuvchi va tarjimon Aleksandr Kuprin tavalludining 145 yilligiga bag‘ishlangan kitob ko‘rgazmasi ochildi. Bu haqda kutubxona matbuot xizmati xabar bermoqda.

Ko‘rgazmadan o‘rin olgan kitoblar orasida Kuprinning ikki va to‘qqiz jildlik tanlangan asarlar to‘plamiga kirgan, nafis ifodalangan obrazlarning xilma-xilligi, lirik holatlari aks ettirilgan “Olesya”, “Sulamif”, “Yoqut ko‘zli bilaguzuk” kabi qissa va hayotning shafqatsiz qiyinchiliklariga qaramay yuksak go‘zallik namunalarini tarannum etgan hayvonlar haqidagi “Oq baroq”, “Oltin xo‘roz”, “Zumrad” hikoyalari rukni, muhojirlikda rus-yapon urushi va birinchi rus inqilobi tafsilotlari bilan bog‘liq “Shtabs-kapitan Ribnikov”, “Hayot dengizi” hikoyalari, “O‘ra”, “Papasha”, “Goga Veselov”, “Bir qo‘llik komendant” qissalari va “Yunkerlar”, “Janeta”, “Vaqt gardishi” romanlari, xotiralardan parchalar, ocherklar va boshqalar munosib o‘rin egallagan.

Mashhur yozuvchining 145 yilligiga bag‘ishlangan ko‘rgazmaga tashrif buyurganlar nemis, fin, fransuz va italyan tillaridan rus tiliga she’rlar o‘girgan tarjimon —  Kuprin haqida ham boy ma’lumotga ega bo‘ladi.