Ўзбекистон Миллий кутубхонасида 7 сентябрь куни рус классик адабиётининг ёрқин намоёндаси, ёзувчи ва таржимон Александр Куприн таваллудининг 145 йиллигига бағишланган китоб кўргазмаси очилди. Бу ҳақда кутубхона матбуот хизмати хабар бермоқда.
Кўргазмадан ўрин олган китоблар орасида Куприннинг икки ва тўққиз жилдлик танланган асарлар тўпламига кирган, нафис ифодаланган образларнинг хилма-хиллиги, лирик ҳолатлари акс эттирилган «Олеся», «Суламиф», «Ёқут кўзли билагузук» каби қисса ва ҳаётнинг шафқатсиз қийинчиликларига қарамай юксак гўзаллик намуналарини тараннум этган ҳайвонлар ҳақидаги «Оқ бароқ», «Олтин хўроз», «Зумрад» ҳикоялари рукни, муҳожирликда рус-япон уруши ва биринчи рус инқилоби тафсилотлари билан боғлиқ «Штабс-капитан Рибников», «Ҳаёт денгизи» ҳикоялари, «Ўра», «Папаша», «Гога Веселов», «Бир қўллик комендант» қиссалари ва «Юнкерлар», «Жанета», «Вақт гардиши» романлари, хотиралардан парчалар, очерклар ва бошқалар муносиб ўрин эгаллаган.
Машҳур ёзувчининг 145 йиллигига бағишланган кўргазмага ташриф буюрганлар немис, фин, француз ва итальян тилларидан рус тилига шеърлар ўгирган таржимон — Куприн ҳақида ҳам бой маълумотга эга бўлади.
Изоҳ (0)