Liviya qirg‘oqlari yaqinida Afrika mamlakatlaridan kelgan muhojirlarni olib ketayotgan kema halokatga uchrashi oqibatida 200 nafargacha odam hayotdan ko‘z yumgan bo‘lishi mumkin, deb xabar bermoqda “TASS”.
Buyuk Britaniya ommaviy axborot vositalarining xabariga ko‘ra, Liviya qirg‘oqlarida bir emas, balki ikki kema halokati yuzlab odamlarning umriga zomin bo‘lgani ehtimoli bor. Birinchi kema bortida 50 ga yaqin, haddan tashqari to‘lgan ikkinchi kemada esa 400 ga yaqin muhojir bo‘lgan. Liviya sohilni qo‘riqlash xizmati 201 kishini qutqarishga muvaffaq bo‘lgan, biroq kema cho‘kayotganda ko‘pchilik yukxonada qolib ketgan.
Kamida 100 ta jasad Zuara shahridagi shifoxonaga olib borilgan. Halok bo‘lganlar orasida Suriya, Bangladesh hamda qator Afrika davlatlari fuqarolari bo‘lgan. Rasmiy manbalarga ko‘ra, qayiqlardagi 147 kishi Tripoli g‘arbida joylashgan Sabrata shahridagi noqonuniy muhojirlar uchun qurilgan lagerlarga joylashtirilgan.
Izoh (0)