Germaniyaning Xerford shahrida ot sporti bo‘yicha bolalar va o‘smirlar o‘rtasida German Friedenships xalqaro musobaqasi o‘tkazildi, deb xabar beradi O‘zbekiston Milliy olimpiya qo‘mitasi matbuot xizmati.
Dunyoning 40 dan ziyod davlati vakillari ishtirokida o‘tkazilgan mazkur musobaqada O‘zbekistondan Timur Azizov (12—15 yosh) va Oqil Sobirjonov (16—18 yosh) g‘oliblik uchun kurash olib bordi.
Qiziq jihati, musobaqa ishtirokchilari ikki kishidan bo‘lib jamoalarga ajratilgan va har bir jamoadan biror bir davlat vakili bilan birga mezbon sportchi o‘rin egalladi. Har bir jamoa a’zolari bir-birlarini yanada yaxshiroq o‘rganib olishi uchun tashkilotchilar xorijdan tashrif buyurgan sportchini jamoadosh sherigi (mahalliy sportchi) xonadoniga joylashtirdi. Musobaqalar oldidan, shuningdek, dunyoning yetakchi chavandozlari Denis Linch, Markus Birbaum, Yana Frederik Meyer va boshqalar ishtirokida mahorat saboqlari (master klass) o‘tkazildi.
Bevosita musobaqa natijalariga to‘xtaladigan bo‘lsak, balandligi 120 sm to‘siqlar osha sakrash bo‘yicha bo‘lib o‘tgan musobaqada Timur Azizov jamoasi ikkinchi ko‘rsatkichni qayd etib, kumush medal sovrindori bo‘ldi. Ular birinchi o‘rinni egallagan jamoadan (AQSh+Germaniya) faqatgina vaqt hisobiga 0,63 soniya ortda qoldi.
O‘smirlar o‘rtasida o‘tkazilgan musobaqalarda ishtirok etgan Oqil Sobirjonov jamoasi esa kuchli o‘ntalikdan joy oldi. Musobaqalar so‘nggida tashkilotchilar o‘zbekistonlik yosh chavandozlarning tayyorgarliklariga yuqori baho berdi va kelgusida ham ularni mana shunday musobaqalarga taklif etish niyatida ekanliklarini bayon qildi.
Ot sporti bo‘yicha bolalar va o‘smirlar o‘rtasida o‘tkaziladigan an’anaviy xalqaro musobaqa g‘olib va sovrindorlariga tashkilotchilar tomonidan ta’sis etilgan medal va diplomlar tantanali sur’atda topshirildi.
Izoh (0)