Германиянинг Херфорд шаҳрида от спорти бўйича болалар ва ўсмирлар ўртасида German Friedenships халқаро мусобақаси ўтказилди, деб хабар беради Ўзбекистон Миллий олимпия қўмитаси матбуот хизмати.
Дунёнинг 40 дан зиёд давлати вакиллари иштирокида ўтказилган мазкур мусобақада Ўзбекистондан Тимур Азизов (12—15 ёш) ва Оқил Собиржонов (16—18 ёш) ғолиблик учун кураш олиб борди.
Қизиқ жиҳати, мусобақа иштирокчилари икки кишидан бўлиб жамоаларга ажратилган ва ҳар бир жамоадан бирор бир давлат вакили билан бирга мезбон спортчи ўрин эгаллади. Ҳар бир жамоа аъзолари бир-бирларини янада яхшироқ ўрганиб олиши учун ташкилотчилар хориждан ташриф буюрган спортчини жамоадош шериги (маҳаллий спортчи) хонадонига жойлаштирди. Мусобақалар олдидан, шунингдек, дунёнинг етакчи чавандозлари Дэнис Линч, Маркус Бирбаум, Яна Фредерик Мейер ва бошқалар иштирокида маҳорат сабоқлари (мастер класс) ўтказилди.
Бевосита мусобақа натижаларига тўхталадиган бўлсак, баландлиги 120 см тўсиқлар оша сакраш бўйича бўлиб ўтган мусобақада Тимур Азизов жамоаси иккинчи кўрсаткични қайд этиб, кумуш медаль совриндори бўлди. Улар биринчи ўринни эгаллаган жамоадан (АҚШ+Германия) фақатгина вақт ҳисобига 0,63 сония ортда қолди.
Ўсмирлар ўртасида ўтказилган мусобақаларда иштирок этган Оқил Собиржонов жамоаси эса кучли ўнталикдан жой олди. Мусобақалар сўнггида ташкилотчилар ўзбекистонлик ёш чавандозларнинг тайёргарликларига юқори баҳо берди ва келгусида ҳам уларни мана шундай мусобақаларга таклиф этиш ниятида эканликларини баён қилди.
От спорти бўйича болалар ва ўсмирлар ўртасида ўтказиладиган анъанавий халқаро мусобақа ғолиб ва совриндорларига ташкилотчилар томонидан таъсис этилган медаль ва дипломлар тантанали суръатда топширилди.
Изоҳ (0)