22-avgust kuni Andijonda “Andijon” hamda “Qo‘qon-1912” jamoalari o‘rtasida bo‘lib o‘tgan “vodiy derbisi” muxlislar o‘rtasida yuqori qiziqishga sabab bo‘ldi, deya xabar bermoqda “Championat.asia”.
Qo‘qonlik Malikjon Meliqo‘ziyev 64 yoshda bo‘lishiga qaramasdan derbini o‘yingohda ko‘rish uchun Andijonga velosipedda yo‘lga chiqdi. Malikjon amakini “Qo‘qon-1912” jamoasi rahbariyati Qo‘qondagi Markaziy o‘yingohga taklif qildi.
“Ertalab soat 6 da yo‘lga chiqib, Andijonga tushdan keyin soat 3 larda yetib bordim. Andijonning Qo‘qonga nisbatan biroz balandroqda joylashganligi sababli mo‘ljallaganimdan biroz sekinroq yetib bordim. Biroq o‘yindan so‘ng barcha charchoqlar esdan chiqib yana kuch-quvvatga to‘lib qolganday bo‘ldim. Barcha futbolchilar va murabbiylarga minnatdorchilik bildiraman. Mana shunday g‘alabalar davomli bo‘lsin. Sizlar g‘alaba qozonib tursalaring biz — muxlislar charchamaymiz”, — dedi Meliqo‘ziyev.
Jamoa a’zolari jonkuyar muxlisga minnatdorchilik tariqasida “Qo‘qon-1912” jamoasining original futbolkasini sovg‘a qildi. Shuningdek, Malikjon amakiga navbatdagi turda bo‘ladigan “Olmaliq” jamoasi bilan o‘yinga markaziy sektordan chipta ham taqdim qilindi. Endi Malikjon amaki sevimli jamoasining safar o‘yinlariga jamoa hisobidan tekinga borishi mumkin bo‘ldi.
Izoh (0)